MITIYABAW karon ang mga nagwelga nga mamumuo sa banana plantation sa Compostela, Comval Province, human gidakop sa mga otoridad ang ilang kauban niadtong Hunyo 2, 2017.
Ang ilang mulo gipasibaw pinaagi sa social media nga gipaambit sab nila sa mga sakop sa media apil na Sun.Star Davao Superbalita.
Gisikop mao si Vicente "Boy" Barrios, kanhi regional chairperson sa Kilusang Mayo Uno Southern Mindanao ug union president sa Nagkahiusang Mamumuo sa Suyapa Farm.
Suma sa impormasyon, si Barrios anaa sa kampo sa mga nag-strike aron makighiusa sa mga nagwelga nga trabahante sa plantasyon sa saging nga gipanag-iyahan sa usa ka negusyanteng Koreana.
Gawas ni Barrios, gisikop sab ang lider sa unyon nga si Pio Salar ug Eric Noble kinsa pulos gitinir sa Compostela Police Station.
Ang nahitabo sa lider sa mga mamumuo sentro karon sa propaganda sa militanteng grupo kontra militar nga maoy nagpatuman sa martial law dinhi
sa Mindanao.
Giingon nila nga kalapasan kini sa katungod sa mga mamumuo nga magwelga kontra sa madaugdaugon nga agalon.
Alang nila, di mga kriminal ang mga gipangdakop kay igo lang sila mipasibaw sa ilang mulo.
Ang otoridad nga maoy nagdakop nila dunay mga rason nganong ila kadtong gihimo. Lamang, wa nila giyagyag sa publiko kung unsa kini.
Sa bahin sa kompanya, mas labaw nga dunay rason nganong nahitabo kadto, apan wa pa lamang nila mapaabot sa katawhan.
Ning panahona, angay magbantay ang tigpatuman sa balaod nga di sila masayop sa ilang lakang, kay kung ila kining himuon, nalapas na nila ang katungod sa yanong mga tawo nga di terorista.