NAPAMATUD-AN na nga di diay gyud terorista ang tawo nga niataki sa Resorts World Manila ug niresulta sa 38 ka tawo nga namatay sa miaging Biyernes. Tawo diay kini nga naaburido tungod sa sugal.
Abu gihapon. Apan dili Abu Sayyaf. Aburido diay.
Nailhan na ang maong tawo nga si Jessie Javier Carlos, 42. Nasayran nga di na kini pasudlon pa og mga casino tungod sa hangyo sa iyang ginikanan kay naadik siya sa sugal.
Si Carlos kanhi empleyado sa Department of Finance nga nadestino sa One-Stop-Shop Tax Credit and Duty Drawback Center apan gitaktak sa Ombudsman tungod sa pangurakot.
Lalim bay niabot og P4 milyones ang iyang utang sa credit card ug kining iyang problema niresulta iyang pagkasungi sa ginikanan ug asawa.
Ang iyang amahan maoy nangayog pasaylo gikan sa publiko labi na sa pamilya sa mga namatay.
Ipahurot
Klarong nimando si Presidente Rodrigo Duterte nga iyang ipapatay ang tanang mga terorista nga ning-alsa karon diha sa Syudad sa Marawi.
Kon ato lang ibasi sa kabangis sa mga sakop sa Isis, di mahimong duna pay mabuhi niining mga terorista karon dinhi sa Pilipinas.
Sa akong tan-aw man gud, dako nang kadaugan alang sa mga terorista kining padayon nilang pagsukol sa pwersa sa kagamhanan.
Apan kon ato na lang sab nga isakripisyo ang mga bihag, mahadlok ko nga daghan ang magduhaduha niini lakip na sa mga sundawo ug sa mga ordinaryong Muslim. Kinabuhi gud na sa mga inosente. Tahas sa kagamhanan nga himuon ang tanan nga sila maluwas.
Sa akong pangagpas, mao kini ang panahom sa presidente isip tubag niining taktika sa mga terorista nga mogamit sa mga sibilyan isip taming batok sa pagpang-ataki.
Di man sab tingale paghadla lang kining kang Digong kay wa man say kulba ang mga terorista. Tungod niini, nahadlok ko nga mas mahimong dugoon pa ang gubat sa Mindanao.
1,200?
Samot kakulba kining balita nga sa nasayran sa mga intelligence officials sa Indonesia, moabot diay kuno sa 1,200 ang mga terorista nga naa sa Mindanao karon.
Tungod tingale niining maong konsiderasyon nga nakaingon si Presidente Duterte nga kinahanglang patyon silang tanan. Kon dunay bihag, dako pa kunong labad kon asa prisohon unya.
Bisan pa man, dako ang akong kumpyansa nga masulbad ra kining maong krisis didto sa Mindanao ug di kinahanglan ang martial law dinhi sa Visayas ug sa Luzon.
Gani, walay hisgot niini si Presidente Duterte dihang nakighinabi siya sa atong kasundalohan didto sa Mactan airbase sa miaging Domingo sa gabii.
Apan, wa kini magpasabot nga di magmatngon dinhi sa Sugbo. Kinahanglan, sama sa gibuhat sa Kilusang Pagbabago, nga nitabang sa pagpadala og mga hinabang sa naapektohan sa gubat sa Mindanao.
(@anol_cebu sa Twitter)