SA DIHANG gideklara ni Pangulong Rodrigo Duterte ang martial law sa tibuok Mindanao niadtong Mayo 23, 2017, tungod sa pag-atake sa Maute terror group sa Marawi City, daghang mga oposisyon ug mga indibiduwal, kasagaran gikan sa Luzon ug Visayas, mireak gilayon ug nabalaka.
Nabalaka sila nga mayatakan ang tawhanong katungod sa katawhan atol sa gipatuman nga 60 ka adlaw nga balaod militar sa isla.
Nabalaka sila nga mabalik ang daghang pangabuso sa militar ug kapulisan sama sa nahitabong martial law panahon ni kanhi presidente Ferdinand Marcos.
Apan taliwala ning mga kabalaka, miabot na lang og kapin duha ka semana nga pagpatuman niini, so far, wala pay gitaho nga mga pangabuso sa militar ug kapulisan, ilabi na ang gikahadlokan nga pagsuspende sa writ of habeas corpus.
Gani dinhi sa dakbayan sa Davao, nakabenepisyo pa niini gumikan kay nakaangkon kita og zero crimes atol mismo sa adlaw nga gideklara ang balaod militar.
Mga Dabawenyo sab di na manglaag og gabii ug sayo pang manguli gikan sa ilang mga lakaw, ilabi na gyud sa mga menor de edad.
Napahimuslan sab ang martial sa taga Davao City kay miluag ang dagan sa trapiko.
Ang City Transport and Traffic Management Office nagsulti nga sa unang 11 ka adlaw nga pagpatuman sa martial law, miarang ug miluag ang dagan sa trapiko sa dakbayan.
Miubos ang kahuot sa mga sakyanan ngadto sa 45 porsiyento nga miresulta sa kahapsay sa dagan sa trapiko.
Gani ang gikahadlokan nga pagsibog sa mga investor ug paghinay sa ekonomiya, mas mihatag pa og seguridad sa mga mamumuhonan nga mobubo og kapital sa dakbayan.
Mga negusyo sab dinhi wala maapektuhi sa martial law, matud pa sa Davao City Investment and Promotion Center (DCIPC).
Gani matud pa DCIPC, nakadawat sila og duha ka investment inquiries matag semana.
Apil sa gipangutana bag-ohay lang mao ang bahin sa potential areas sa siyudad kon asa sila makabubo og kapital.
Imbis nga kabalaka ug kahadlok ang maghari dinhi sa Davao City, mas gipalig-on pa sa martial law ang tunhay na nga kahimtang ug seguridad aron nga magpabilin ang kalinaw dinhi.
Kini maoy epekto sa deklarasyon sa martial law sa dakbayan.