MGA 350 ka mga tawo ang nalingaw og tan-aw sa exclusive movie screening sa dihang kalit nga nahagsa ang parte sa kisame sa Cinema 5 sa Ayala Center Cebu. Alas 8:50 sa gabii sa miaging Lunes nga nagkaguliyang ang mga tawo sa sulod sa wala damhang disgrasya.

Unom ka mga tawo ang naangol. Si Mark Evans nga Chief Executive Officer sa usa ka production network ang apil sa nagarasan sa abaga human naigo sa kisame.

Gibana-bana nga mga 30 ngadto sa 40 metros kuwadrado nga kisame ang nahagsa sa may upper box sa sinehan.

Ang mga empleyado sa kompaniya nga gidumala ni Evans ang miabang sa Cinema 5 alang sa presentasyon sa usa ka salida. Wala damha nga ingon adto ang ilang dangatan.

Ang parte sa kisame nasudlan og daghang tubig ug tungod sa kabug-at, ang kisame inanay nga nahagsa inubanan sa pagwaswas sa tubig.

Ang mga lig-ong punto nga ipangutana sa mga tigdumala sa Ayala kon unsa kalig-on ang ilang sinehan? Nganong nalangay ug mga 25 minutos ang ilang personahe sa pagresponde? Nganong wala dayon nila pasudla ang rescuers sa establisemento aron sa pagluwas sa mga naangol? Duna ba silay regular nga maintenance sa ilang sinehan?

Si Atty. Jeanette Japzon nga maoy namaba alang sa Ayala akong nahinabi sa programa Straight to the Point sa dyHP. Matod ni Japzon nga padayon ang ilang imbestigasyon sa mao nga disgrasya.

Nipasabot si Japzon nga kay nag-panic pa ang mga tawo sa sulod, wala dayon makaresponde ang ilang mga personahe. Naatlan sab nga gamay na lang nga guwardiya niadtong tungora. Gipatin-aw ni Japzon nga dunay mga rescuers ang wala na pasudla kay duna nay mga nakauna nga rescuers ug ilang gilimitahan ang makasulod.

Mas maayo nga susihon pag-usab sa mga tigdumala sa Ayala dili lang ang ilang mga sinehan, apan ang kinatibuk-an mismo nga estruktura. Susihon usab kon unsay gamot sa disgrasya.

Kon ang gamot sa disgrasya gitawag og force majeure diin sumala sa balaod dili matag-an nga panghitabo o bisan matag-an dili malikayan, mahimong makalingkawas ang Ayala sa tulubagon (Art. 1174, New Civil Code). Pananglitan nga kon atol sa disgrasya duna ba kahay linog.

Apan lisod pa nga mohimo ta og espekulasyon niining kasoha samtang nagpadayon ang imbestigasyon. Mipasalig si Japzon nga ang Ayala dili motalikod sa ilang responsiblidad labi na sa mga nasamdan ug sa mga tawo nga gibati og grabeng kalisang.

Angayang tan-awon usab sa Ayala kon dili ba pinadagan ang pagtrabaho sa contractor sa ilang sinehan? Unsa ba kapulido ang kisame ug natarong ba ug taod ang sprinkler system sa tubig?