ANG paghipos sa mga makililimos ug mga batang libud-suroy sa kadalanan o plazas sa dakbayan dili pagdaugdaog kanila, kini responsibilidad sa kagamhanan sa pagpahiluna kanila sa insaktong dapit ug ipaubos sa rehabilitasyon aron takos sila nga ibalik sa normal nga kinabuhi sa komunidad nga wala magsalig sa uban sa ilang pagpakabuhi ning kalibotan.

Usa kini sa mandato sa Social Welfare and Development (DSWD) apan tungod sa usab sa kadaghang gisangon nga programa sa ahensya, seguro wala na kini matutoki pag-ayo. Panahon na seguro nga mag-umol og laing ahensya nga motutok lang sa paghipos sa mga tawo libud-suroy sa kadalanan.

Ang nakalain lang tan-awon sa publiko ug dakong sala sa mata sa Manunubos nga ang mga libud-suroy o mga makililimos hipuson lang panahon sa dunay dagkong kalihokan o kampanya sa turismo tungod sa panan-aw nga sama sila sa basura sa palibot nga silhigon. Human sa garbusong kalihokan, buhian na lang usab sa kadalanan?

Sa Asia-Pacific Economic Coope­ration (Apec) Summit sa Sugbo karong Agusto ning tuiga, ang awtoridad nagplano na usab sa paghipos kanila sa kadalanan uban sa pagpanindot sa palibot sa dakbayan alang sa pagpasigarbo sa atong dapit mga bisita nga sagad mga taas nga opisyal sa mga nasod sa Asya. Dili kinimaayo lihok sa kagamhanan. Kinahanglan seryuso sila sa pagdumala sa tukma nga rehabilitasyon.

Hinuon, kaakohan nato kini tanan sa pagtabang kanila. Kon dunay kita kabanay o kaila, pwedeng ihatod nato sa tukma nga ahensya sa kagamhanan.