IPATUMAN ni Cebu City Mayor Tomas Osmeña ang Children’s Safety on Motorcycles Act o Republic Act 10666, ang balaud nga nagdili sa pagpaangkas og mga bata nga di matugkad ang mga tiil sa foot peg kun tumbanan sa angkas sa motorsiklo.
Apan matod sa mayor nga ang multa sa makalapas P5 ra, inay P3,000 sa unang kalapasan sumala sa nalatid sa mao nga balaud. Tumanon man tuod niya ang balaud, apan sa multa, ubos ang iyang paninglon.
Iyang gidayeg ang mga habalhabal driver, nga maoy sagad sakyan sa mga bata, nga dako og natabang sa yanong mga kawani nga di ma-late sa trabaho.
Bitaw, ang mga lugar nga kaniadto lisod adtuon tungod sa suliran sa tranportasyon, maadto na. Daghan na usab ang manakay og habalhabal taliwa sa kahuot sa trapiko.
Dunay punto ang mayor nga nakatabang ang mga habalhabal sa panginahanglan sa transportasyon sa yanong mga lungsoranon.
Apan tumban lang ba ang balaud, kansang tumong mao ang kaluwasan sa kabataan?
Klaro ang nalatid sa balaud, busa angay tumanon.
Nganong di man mangita og paagi ang Siyudad nga makahatag og mas luwas nga alternatibong transportasyon alang sa mga ginikanan nga magdala sa ilang mga anak nga magmotorsiklo, inay pasagdan lang nga magpadayon ang kuyaw nga buhat sa kadaghanan? Kon tan-awon og maayo, ang balaud gitumong alang sa kaluwasan sa kabataan.
Wa did-i ang pagpaangkas sa mga bata sa kabukiran sa motorsiklo kay ang balaud nag-ingon nga sa highway nga dunay daghang mga sakyanan nga kusog magdagan, mao ray dapit diin kini gidili.
Sa ato pa, mahimo rang mobalhin og kasakyan. Mas maayong magtambayayong ug barangays sa pagpangitag paagi sa paghatag og mas luwas nga transportasyon sa yanong mga lungsoranon.