DAVAO DEL SUR - Giinagurahan sa Davao del Sur Electric Cooperative (Dasureco) ang ilang satellite office sa ground floor sa Gaisano Mall of Digos.
Gibutyag ni Engineer Godofredo Guya, Dasureco general manager, nga dako kining benepisyo sa tanang konsumante sa probinsiya aron dili na madak-an sa ilang pamasahe aron mohimo og bisan unsang transaksiyon sa ilang main office sa Barangay Cogon, Digos City.
Usa ka simpleng programa sab ang gipahigayon human nga gi-bendisyonan ang maong buhatan Huwebes sa buntag, Hunyo 8.
Matud ni Guya nga sa satellite office dili lang ang pagbayad og billing ang ilang dawaton kon di lakip na ang pag-apply sa pagpataod og kuryente, magpa-konekta kon naputlan ug uban pang katuyoan.
"So kung naa silay paliton sa mall, mora'g one-stop-shop na lang ni siya kay naa na dinhi ang Dasureco kon mobayad sila," ni Guya.
Dako sab ang pasalamat ni Guya sa Gaisano tungod kay libreng gipagamit kanila ang maong puwesto nga way arkila.
Gidason ni Guya nga gihimo na sab nilang simple ang pagbayad og bill sanglit ang mga ATM machine aduna nay link sa Dasureco diin mamahimong mobayad sa online transaction. (Orlando B. Dinoy)