ANG peace corridor nga gimugna sa gobyerno giilang dakong tabang sa pagsalbar sa gatusan ka mga sibilyan nga natanggong sa giyera sa Marawi City.
Tumong sa peace corridor nga maluwas ang tanan nga gibana-bana nga naa sa kapin libu ka mga sibilyan, apan posible nga malutsan gihapon sa terorista.
"Mayroon pa doon mga more than a thousand civilians," sulti ni Irene Santiago, chairperson sa Peace Implementing Panel sa gobyerno sa hinabing pangkalinaw tali Moro Islamic Liberation Front (MILF), sa pakighinabi kaniya didto The Royal Mandaya Hotel Huwebes, Hunyo 8.
Ang peace corridor namugna uban sa pagbuligay sa gobyerno, Moro Islamic Liberation Front (MILF) ug Moro Islamic National Liberation Front (MILF) nga nabalaka sa kahimtang sa mga sibilyan.
Si Santiago nagsulti nga ang peace corridor gihimo nila sud sa duha ka oras aron maseguro nga ang mga tawo nga mosud ug mogawas sa lugar, luwas nga makabiya.
Dihang gipangutana kung duna bay posibilidad nga makalusot ang mga terorista uban sa mga sibilyan, siya nagbutyag nga posible.
"There is always a possibility, but the military knows what they are doing," sulti ni Santiago.
Kini human nasayran nga nadakpan dinhi sa dakbayan sa Davao nga si Cayamura Maute, amahan sa managsuong Maute nga terorista, gikan sa Marawi City niadtong Dominggo, adlaw nga gipatuman ang peace corridor.
Gipasabot sa opisyal nga sa dapit diin gimuntar ang peace corridor, susihon og maayo sa kapulisan ug militar ang mga tawo nga buot moagi sa dapit.
"Inisa-isa silang tinanong ang kanilang mga pangalan," pahayag sa opisyal.
Sa Marawi City niadtong Dominggo sa buntag, Hunyo 4, ang Joint Coordinating, Monitoring, and Assistance Center sa Government of the Philippines (GPH)-MILF Peace Corridor miabag sa edaran nga babaye nga makabiya sa lugar diin nahitabo ang giyera.
Siya usa sa pasiunang 134 ka mga sibilyan nga naluwas sa gimuntar nga peace corridor sa Marawi City.
Ang upat ka oras nga pagpatuman sa humanitarian pause niadtong Dominggo nahimo pinaagi sa tabang sa emisaryo kinsa nakakuha sa pagtugot sa Maute Group nga ipatuman ang upat ka oras nga ceasefire.
Nasayran nga mga Moro nga miyembro sa Joint Coordinating, Monitoring, and Assistance Center sa GPH-MILF peace panels nga mga Maranaw lamang ang gitugotan nga makasud sa giilang conflict zone, subay sa kondisyon sa Maute, nga gipadangat sa emisaryo.
Sa pagkakaron, suma ni Santiago, ilang gipapahuway una ang emisaryo sanglit duna kini sakit.