COTABATO CITY -- Mismong si Pangulong Benigno Aquino III ug Moro Islamic Liberation Front (MILF) chairman Aljads Murad Ibrahim ang nanguna sa gihimong decommissioning process didto sa Old Provincial Capitol, Barangay Simuay, Sultan Kudarat, Maguindanao kagahapon.
Gikanayon ni MILF Chief Negotiator Mohagher Iqbal ug GPH Peace Panel Chair Professor Meriam Coronel Ferrer nga mao kini ang una nga hugna sa proseso sa pagtunol sa 55 ka mga tag-as nga matang sa armas gikan sa 145 ka miyembro sa Bangsamoro Islamic Armed Forces (BIAF) sa MILF.
Ang decommissioning kabahin sa Annex on Normalization nga gipirmahan sa MILF ug gobyerno niadtong bulan sa Enero tuig 2014.
Ang 145 ka miyembro sa MILF nga gipailawom sa decommissioning midawat og P25 mil ug Philhealth cards gikan sa gobyerno.
Ang mga armas nga gitahan sa MILF dawaton sa mga miyembro sa Independence Decommissioning Body (IDB) ug ibutang sa usa ka storage area sa kanhi Camp Abubakar nga karon kampo na sa 603nd Brigade sa Philippine Army.
Gikanayon ni MILF 1st Vice-Chairman for Political Affairs Gadzaali Jaafar nga ang pagtahan sa ilang mga armas kabahin sa pagsunod sa ilang organisasyon ug Bangsamoro sa nasabutan tali ngadto sa gobyerno.
Giklaro ni Jaafar nga ang pagtunol sa ilang mga armas dili surender apan kabahin sa proseso sa panghinabing pangkalinaw Mindanao.
Nanghinaot sab si Pangulong Aquino ug MILF Chairman Ibrahim nga ma-aprobahan na ang Bangsamoro Basic Law sa pagsugod sa decommissioning process.
Samtang gibatikos ni PNoy kadtong mga grupo o indibiduwal nga supak sa BBL nga dili gusto og kalinaw sa Mindanao.
Gawas sa Presidente ug kang Ibrahim mitambong sab ang mga opisyal sa GPH/MILF Peace Panel, 6th ID Chief Major General Edmundo Pangilinan, Maguindanao Governor Esmael "Toto" Mangudadatu, North Cotabato Governor Emmylou "Lala" Talino Mendoza, ARMM Governor Mujiv Hataman, mga miyembro sa International Monitoring Team (IMT), non-government organizations, religious group, private sector ug uban pa nga grupo.(Edgar E. Fuerzas)