GIBUHIAN na ang municipal councilor gikan sa Leyte kinsa nadakpan nga namaligya og peke nga official receipts ug certificates of appearance ngadto sa mga konsehal nga mitambong sa Philippine Councilors League (PCL) national event dinhi sa Dakabyan sa Davao niadtong Lunes sa hapon.

Kini human nga mitugot ang Regional Trial Court sa petisyon sa konsehal nga makapiyansa.

Si RTC Branch 16 Presiding Judge Emmanuel Carpio nagmando nga buhian si Albuera, Leyte Councilor Sergio Batistis Jr., kinsa gikasohan og swindling pinaagi sa falsification of public documents, human mibayad og piyansa nga P24,000.

Mahinumdoman nga si Batistis nadakpan pinaagi sa entrapment operation nga gihimo sa Sta. Ana police sud sa SMX Convention Center, SM Lanang Premier niadtong Huwebes.

Nakuha gikan kaniya mao ang mga peke nga official receipts ug certificates, cellular phone, ug P103,500 salapi nga kita sa matud pa ilegal niyang transaksiyon.

Si PCL executive director Councilor Wilson Paclibar sa Tantangan sayo niini nagsulti nga ang kuwarta gibayad ngadto kang Batistis sa pipila ka mga konsehal kinsa nadani nga mobayad og registration fee isip discounted rate.

Matod ni Paclibar nga ang modus operandi sa suspek nahibaw-an na sa milabay pang mga gihimong PCL.(KGL)