NASIKOP sa kapulisan ang usa ka 39-anyos nga lalaki human naaktuhan nga nagpatibuok og peke nga kuwarta niadtong Sabado didto sa Jacinto Street, Barangay 32-D, Poblacion.
Ang suspek nailhan nga si Erano Lasaga Milano, mulupyo sa Father Selga Street, Barangay 8-A, Poblacion.
Sa inisyal nga imbestigasyon sa Sta. Ana Police Station nasayran nga nakiglalis ang biktima nga si Chardy Dapulang Bonotan, ngadto sa suspek human niya nakambiyohan og P500 ang mga peke nga kuwarta sa suspek.
Atol sa kasamok, naagian sa mobile patrol sa presinto uno ang panaglalis sa duruha maong nakahigayon ang mga pulis sa pagsikop niini.
Nakuha sa posisyon sa suspek ang usa ka back pack nga dunay sulod nga mga peke nga kuwarta, gilangkuban sa mga P20, P50, ug P100 bill nga mokabat sa P47-mil.
Si Police Inspector Ireneo Brillantes Jr., chief investigation section sa presinto uno nagbutyag nga posibleng mokatag ang nasampit nga mga kuwarta labi na niining hinangat ang eleksiyon.
"Posible nga mokatag kini, considering nga hapit na ang eleksiyon, maayo na lang nga nasikop nato aron mapugngan," ingon ni Brillantes sa pakighinabi sa Superbalita kagahapon.
"Basi'g naa pa nakalusot nga fake bills so dapat magbantay ang publiko," sumpay ni Brillantes.
Ang suspek kasamtangan nga gibalhog sa selda sa Sta. Ana samtang gihikay na ang kaso nga ipasaka kaniya sa korte.(JPC)