USA ka babaye ang midangop sa buhatan sa kapulisan aron nga ipatala ang pagsagpa kaniya sa lalaki nga gika-sex kinsa nasuko nga pagamiton og condom.

Ang insidente natigayon sa alas 2:00 kagahapon sa kaadlawon, didto sa bakanteng luna sa Artiaga Street, Barangay 35-D, Poblacion.

Mipatim-aw sa Sta. Ana Police Station si alyas Barbe (bansagon gitago), nagpuyo sa Barangay Sto. Niño, Tugbok District.

Subay sa natala sa presinto uno nasayran nga nagsabot ang duha nga mag-sex, apan buot sa babaye nga mogamit ang lalaki og condom.

Gi-ingon nga dihang sul-uban na sa babaye og condom ang kinaiya sa iyang ka-sex nga si alyas Ronald, nasuko kini ug iyang gitanggal ang condom dayon kalit niyang gilaparo ang babaye.

Human sa paglaparo, alegasyong gituklod pa ang babaye sa pader dayon gikuha sa lalaki ang iyang P2-mil nga salapi ug mikaratil og sibat padung sa wa matino nga direksiyon.

Daling nangayo og pakitabang ang babaye sa mga boarders sa dapit aron makapanawag og pulis, apan pakyas siya nga madakpan ang lalaki.

Kagahapon sa buntag, mikuha'g medical certificate ang babaye ug gipatala sa kapulisan ang nahitabo kaniya.