DILI halayo sa katinuoran nga matuman na gyud karong buntag ang damgo sa Golden State Warriors nga matambalan na ang 40 ka tuig nilang kauhaw sa kampyonato sa NBA.
Kon dili lang mausab ang dagan sa momentum sa series sa ilang pagpakigsangka sa Cleveland Cavaliers sa Game 6 sa 2015 NBA Finals karong buntag, way rason kon nganong di makaselebrar ang Warriors sa ilang kampyonato diha mismo sa korte sa Cavaliers.
Sa gipakitang labok sa Warriors sa Game 4 ug Game 5, naobserbahan nga epektibo kaayo ang stratehiya ni coach Steve Kerr nga mao ang paggamit sa iyang mugbong lineup alang sa pakusganay.
Kini maoy naghatag og labad sa ulo ni Cavaliers coach David Blatt kon unsaon kini niya pag-counter ang gikusgon sa Golden State ilabi na sa Game 4 diin sila gilubong og maayo.
Apan sa Game 5, pildi man tuod apan adunay positibong butang nga nakita si coach Blatt taliwala sa maong kapildihan.
Sa maong duwa, sulod sa kapin tulo ka mga quarters, nakakombati og sakto ang Cavaliers nga nakahatag pa gani og dakong hudlat sa Warriors, apan gilupig lang gyud kini sa lahutay tungod sa hangin.
Nagtuo si Blatt nga makakombati usab batok sa Warriors ang iyang gagmayng lineup ug posibling kini maoy estratihiya nga iyang gamiton gihapon sa Game 6 karong buntag.
Kini maoy usa sa mga rason kon nganong wa ibabad ni coach Blatt ang higanting si Timofey Mozgov sa Game 5 niadtong Lunes bisan pa man maayo kaayo kining nakaduwa sa Game 4.
Ang 7-1 nga sentro mitali og 28 puntos ug 10 ka rebounds sa Game 4 apan maglisod kini pag-apas og depensa sa 6-7 nga si Draymond Green hinungdan nga gidominar sila sa kinatibuk-ang panag-engkuwentro ug natabla sa finals series, 2-2.
Pero di kaha kini disadvantage sa rebounding department sa Cavaliers kon dili nila pahimuslan ang gidak-on ug gitas-on ni Mozgov?
Sa series, ang statistic nagpakita nga gilupig sa Cavs ang Warriors sa rebounding department.
Pero sa Game 5 diin wa kaayoy playing time si Mozgov, gilupig sila sa linayatay ilabi na sa uwahing bahin sa fourth quarter diin nakalangkat og pipila ka offensive rebounds ang Golden State.
Misaka man tuod ang percentage sa opensa sa Cavs ngadto sa 88.4 percent apan ang sa Warriors misulbong og maayo ngadto sa 107.9 percent - dul-an sa 20 porsiyento nga pagsaka.
Buot pasabot nga nakapatuyang sa pakusganay ang Warriors tungod kay sila man ang midominar sa rebound ug ila usab nga gipahimuslan ang pagkawagtang ni Mozgov sa ilawom nga bahin.
Kon mosabay gani gihapon ang Cavaliers sa style sa Warriors nga pakusganay di na lang ta magpaabot nga aduna pay Game 7. Ang Cavaliers nagmadaugon tungod sa paggamit sa ilang gidak-on. Kini maoy angay unta nilang pahimuslan.
Kon nagtuo si Blatt nga aduna siyay ikatugbang sa pakusganay batok sa Warriors, di sab niya kalimtan ang paggamit sa player nga nakahatag og bintaha sa team. If not quantity, why not give Mozgov a quality minutes? (junmigs0622@yahoo.com)