SAGUBANGON ni Stephen Curry ug sa iyang mga kauban sa Golden State Warriors ang labing dako nilang tahas sa ilang pag-asdang sa balwarte sa Cleveland Cavaliers karong buntag (RP time) aron suwayan paglangkat ang labing una nilang titulo sa National Basketball Association (NBA) sa milabayng upat ka mga dekada.

Ang Warriors gikan sa 104-91 nga kadaugan sa Game 5 nga naghatag kanila og 3-2 nga bintaha sa best-of-seven series ug usa na lang ka daog, makab-ot na nila ang hingpit nga kalampusan.

“This is going to be the biggest game any of us have ever played in our careers,” matod ni Warriors forward Andre Iguodala.

“It’s all about staying locked in, about knowing it’s not going to be given to us. We have to earn it.”

Si Curry, kinsa maoy kasamtangang MVP, nipugnit og 37 puntos sa Game 5 apan human niini, nabiktima siya sa dehydration. Hinuon gikatahong naulian na kini ug andam nang mangulo pagbalik sa Warriors.

Basi sa iyang kasinatian dihang nagduwa pa siya, si Warriors coach Steve Kerr miangkon nga ang duwa diin puwede nang makuha ang korona mao ang labing lisod nga dag-on.

“The closeout game is always the hardest game in every series, but particularly in the finals,” matod ni Kerr, kinsa kanhi sakop sa Chicago Bulls ningdominar niadtong dekada 90.

“There’s a lot of emotion. You’re right there on the cusp of something, but you still have to get the job done, and in this case we’ll be on the road against a great team.”

Wala’y bisan usa ka mga magduduwa sa kasamtangang puwersa sa Warriors ang nahimugso dihang ningkampiyon ang team niadtong 1975.

Unya ang Warriors puwedeng ma­hi­mong unang puwersa nga wala’y ka­si­natian sa finals ang tanang mga magduduwa nga makalangkat og titulo gikan niadtong 1991 Chicago Bulls.

“Treat it like game seven,” matod ni Warriors guard Klay Thompson. “As much as we would love to win it in front of our fans, we really want to finish it in Cleveland.”

Apan dili bastabasta motugot niini si Lebron James ug ang kinatibuk-ang puwersa sa Cavaliers.

“We don’t want them celebrating at all, no matter if it’s on our home floor or their home floor,” matod ni James. “We’ve come this far and we’ve been very good at home.”

Nangaluya sa pinaspasay nga duwa sa Warriors, ang kuwangan og tawo nga Cavaliers nakatilaw og grabeng kastigo sa Game 4 sa ila mismong balwarte, usa ka panghitabo nga dili nila gustong masinati pagbalik.

“We have to understand why we weren’t good in game four,” dugang ni James. “We had a lack of energy. We had a lack of effort in a lot of areas in game four and we can’t repeat that or they will raise the trophy for sure.”

Tatawng naa sa Warriors ang momentum apan hangtod nga dili pa mahuman ang series, magpabiling usa ka dakong hulga kanila si James, kinsa kanhi four-time MVP.

“He’s phe­no­menal. He does everything,” asoy ni Kerr kabahin kang James. “But I’m not enjoy­ing the marveling.”

Apan giklaro ni Kerr nga dasok og pagsalig ang iyang kinatibuk-ang puwersa ug dili kini bastabasta matay-og sa bisan unsa’y paningkamot ni James ug sa Cavaliers.

Ang Warriors ning­sulod sa playoffs nga puno nang daan og pagsalig human nila naangkon ang no.1 nga luna sa regular season bitbit ang 67-15 nga rekord. (AFP)