NIDANGOP sa Facebook ang pipila nga nabiktima sa usa ka aksidente sa usa ka mall. Apan kay wa man kini ma-cover sa mga tigbalita, dunay niinsister nga fake news lagi kuno ang gihisgutan online.
Ako lang iklaro nga tinuod ang maong hitabo diin naa sa sulod sa maong elevator ang 12 ka mga tawo dihang nahulog kini gikan sa third floor ngadto sa second floor. Dayon wa sila makagawas dayon human sa aksidente.
Maayo kay walay nangaangol sa maong hitabo.
Ang wala nila mauyoni gawas sa gubaon diay ang elevator ug makeup kit ang sulod sa tool box sa maong kahimanan sa mall, mao ang reaksyon sa mga personnel.
Imbes mas motutok sa ilang kahimtang isip mga biktima, mas gihatagan pa og atensyon ang kahimtang sa elevator. Dayon, buot unta ipa-delete ang video sa hitabo.
Karon, kay walay naka-cover sa maong hitabo, ipaguwa dayon nga fake news?
Ang wala ma-anticipate sa mga tinugyanan sa mall kay tungod sa ilang tinagdan sa mga nabiktima, nireklamo hinuon kini sa Office of the Building Official sa Cebu City Hall.
Atong na-monitor kagahapon ang balita sa DYLA nga nagkutlo mismo sa OBO.
Fake news?
Nagkalisod na karon ang pag-ila kon unsay fake news kay bisan ang tinuod nga hitabo, ingnon man dayon nga di diay tinuod kay wala mapatik sa media.
Dayon dunay moingon nga ang napatik sa media di sab katuohan kay wa mosubay sa ilang pagtuo.
Bisan pa man, mahinungdanon karon nga ang publiko mismo magmatngon na kabahin sa mga lain-laing mga kalaki sa propaganda.
Di kita motuo dayon. Ug kon nasipyat man, di nato ipadayon sa pag-share ang usa ka post nga klarong sayop.
Apan, magmatngon sab kita nga dunay mga tawo nga dali kaayong makaingon nga fake news ang tinuod diay nga nahitabo.
Durano
Sama ra sa nidaog si Mayor Nito Durano niining labing ulahing resolusyon sa Court of Appeals batok sa gimando sa Ombudsman nga tulo ka bulan nga suspensyon batok kaniya.
Ang temporary restraining order (TRO) nga giluwat sa CA gihimo niining preliminary injunction. Buot ipasabot, dili na mapakanaog ang maong suspensyon.
Dayon, gibasura ang lakang sa Visayas Ombudsman nga mobabag sa petisyon sa mayor alang sa usa ka TRO.
Kay unsa man say pulos pa sa preventive suspension nga na-reinstate na man ug nahatagan sa sweldo ang mga empleyado nga nangreklamo sa wala pa nimando ang Visayas Ombudsman?
(@anol_cebu sa Twitter)