MOHATAG og kinatibuk-ang suporta ang Alaska Aces alang sa kampanya sa Gilas Pilipinas sa umaabot nga FIBA Asia Men’sChampionship.
Gisaway ang Alaska gumikan kay wala kini nagpahuwam sa ilang mga magduduwa sa tulo ka mayorihiyang international tournaments nga giapilan sa Gilas.
Usa ka tinubdan ang nibutyag sa www.spin.ph nga gitugtan ni Alaska team owner Wilfred Uytengsu ang iyang mga beteranong sila si Sonny Thoss ug Dondon Hontiveros nga moapil sa tryout sa Gilas.
Misugot sab si Uytengsu nga maapil ang ilang headcoach nga si Alex Compton sa mga staff ni national coach Tab Baldwin.
“Last month pa nililigawan si coach Alex sa amin. Pumayag na nga raw si Boss (Uytengsu), basta’t ang kanya hindi makaka-apekto sa kampanya ng team sa PBA,” matod pa sa tinubdan.
Si Compton wala pa makuhai og komentaryo kabahin niini kay kasamtangan kining naa sa Amerika aron motambong sa 50th wedding anniversary sa iyang mga ginikanan.
Gawas nila ni Hontiveros ug Thoss, ang ubang mga magduduwa sa Aces nga posibleng makuha sa Gilas mao sila si JVee Casio ug Calvin Abueva.