DASOK sa gimbuhaton si kanhi UAAP MVP ug RP national team member Ray Parks karong semana sa Amerika sa pagpadayon niya’g gukod sa iyang pangandoy nga makaduwa sa National Basketball Association (NBA).
Ang 6’4” nga basketbolista niapil sa pre-draft workout sa Utah Jazz kagahapon. Moapil sab siya sa pre-draft workout sa Brooklyn Nets, Dallas Mavericks, Atlanta Hawks ug Boston Celtics.
“I think I did alright,” asoy ni Parks nga migawas sa artikulo sa www.interaksyon.com. “There’s a lot of talent out there. I just really want to do what I can do — work hard.”
Nagtuo si Parks nga aduna siya’y igong abilidad nga makatabang sa pagtuman sa iyang pangandoy.
“Just energy. Being a tall guard that can play one and two spots. I hope I can bring that to the next level and I hope teams would see that. And anything on offense — I can knock down open shots, get layups.”
Atubangan sa mga reporter, gihisgutan pagbalik ni Parks ang iyang desisyon nga pagtalikod sa sumosulbong niyang basketball career sa Amerika aron mobalik sa Pilipinas aron makabantay sa masakiton niyang amahan nga si Bobby Ray Parks, kinsa nipanaw niadtong 2013 sa sakit nga cancer.
Ang amahan ni Parks maoy kanhi seven-time Best Import awardee sa Philippine Basketball Association (PBA).
Si Parks usa sa mga sumosulbong nga basketbolista sa Memphis dihang nagtungha pa siya sa high school una kini nakadesisyon nga moduwa sa National University sa UAAP.