TAGBILARAN CITY - Dead on the spot ug naligo sa kaugalingong dugo ang usa ka lalaki human kini gipusil sa makadaghan sa mailhing suspek niadtong Hunyo 14 sa gabii samtang nanihapon ang biktima kauban sa iyang live-in partner sud sa may Haydee’s Barbeque Haus sa may Tamblot Street, Poblacion 3, dakbayan sa Tagbilaran.

Naabtan sa kapulisan nga wa nay kinabuhi ang biktima nga giila nga si Reynaldo Pocoy, 37, ug residente sa Sta. Cruz, Poblacion 3 sa dakbayan kauban sa iyang katipon nga si Razil Cagabcab.

Samtang nagkaon ang biktima kauban sa partner niini kalit lang nga adunay mihunong nga motorsiklo sakay ang usa ka wa mailhing supek ug gidul-itan kining pusil sa makadaghan ang biktima atubangan mismo sa iyang partner. Wa mailhi ang suspek tungod sa bonnet nga gisul-ot sa nawong niini.

Nakaangkon og daghang samad pinusilan ang biktima sa may ulo niini hinungdan sa iyang kamatayon.

Sa dugang imbestigasyon nasayran nga nalambigit ang biktima sa ilegal nga drugas.