ORMOC CITY - Gisugdan na sa lokal nga kagamhanan ning dakbayan ang paghatag sa Emergency Shelter Assistance (ESA) ngadto sa mga benipisyaryo.

Sa milabayng Lunes, gisugdan ang paghatag sa Multi Purpose Hall sa City Hall ug sa 110 ka barangay ang Barangay RM Tan ang unang nikuha.

Base sa datos sa barangay, 327 ang hingpit nga nawad-an og balay human sa Yolanda ug nakadawat og P15,000 kapin samtang 129 ang wa kaayo magub-i og nakadawat og P10,000.

Giseguro sa kagamhanan nga madawat sa benipisyaryo hangtod ang kinatumyang sentimo.

May mensahe si Ormoc City Mayor Edward Codilla sa mga nisaway ug niingon nga di na madawat sa benipisyaryo ang ESA.

“Sa kadtong wa motuo niadto nga mahatag ang ESA, dia na. Pwede mo moari sa City Hall aron makita ninyo,” matod sa mayor.

Hapsay ang unang adlaw sa paghatag sa ESA.

Ang 19th Infantry Battalion sa Philippine Army nagpadala og tropa ingon man ang kapulisan sa Ormoc City Police Office (OCPO) aron mobantay sa pagpanghatag.

May giinstalar usab nga tulo ka Closed Circuit Television (CCTV) Camera sa Multi Purpose Hall.

Si Victoriano Roble nakadawat og P10,000 samtang si Bernardo Espi­nosa nakadawat og P15,000 kapin.

Silang duha ang be­nipisyaryo nga unang nidawat sa ESA.

“Pasalamat mi nga dia na nadawat na namo, palit dayun ko og bugas ug ubang kinahanglanon sa balay,” matod ni Espinosa.