KAPIN sa 100 ka mga prepaid meter ang gisugdan na pagmontar sa Visayan Electric Company (Veco) sa dakbayan sa Naga sugod karong buwana.

Alang kini sa phase 2 sa ilang prepaid scheme sa kuryente sa ilang mga konsumidor diin susama kini og cellphone nga load lang ang bayad sa kuryente.

Matod sa corporate communications managaer sa Veco nga si Ma. Theresa Sederiosa nga nagmalampuson ang ilang unang bahin sa prepaid scheme niadtong miaging tuig diin 48 ka mga prepaid meters usab ang ilang gipasuway sa mga konsumidor nila sa samang dakbayan.

Dugang ni Sederiosa nga napili nila ang dakbayan nga sugdan sa naasoyng matang sa pamaagi sa kuryente tu­ngod kay gidawat kini sa mga konsumidor ingon man nga gihangop nila ang ekspiremento.

Ang prepaid scheme dili na bag-o dinhi sa nasod tungod kay nagsugod kini sa Tacloban City sa lalawigan sa Leyte.

Apan matod sa regional director sa Energy Regulatory Commission (ERC) 7 nga si Atty. Joel Bontuyan nga wa pa mahimo ang rules and regulations kabahin niini kaniadto.