MIHIMO og kaugalingon nga imbestigasyon ang Department of Health (DOH) sa Central Visayas sa kamatayon sa walo ka buwan nga bata sa St. Anthony Mother and Child Hospital (SAMCH), dakbayan sa Sugbo sa niaging semana.

Samtang, miawhag usab ang Commission on Human Rights (CHR) 7 sa pamilya bata nga mobisita sa ilang buhatan aron matabanga nila sa ilang problema.

Si Dr. Jaime Bernadas, regional director sa DOH 7, nimando sa chief of hospital sa SAMCH nga si Dr. Robert Dinopol, sa pagduso og incident report sa nahitabo sud sa 72 ka oras.

Ang suwat reklamo sa mga ginikanan sa bata nga namatay nga si Harry Morgan Visaya pinaagi sa ilang abogado nga si Ferdinand Berongoy, ang nadawat na sa DOH 7 niadtong niaging adlawa.

Si Bernadas nag-umol og investigation committee nga gipangulohan ni Dr. Sophia Mancao, pangulo sa Regulation Licensing Enforcement Division sa DOH 7, aron sugdan ang imbestigasyon sa nahitabo.

“We will also reply officially to the letter complaint. The fact-finding committee will meet immediately for planning and start with the incident and the letter complaint,” tipik sa pamahayag ni Bernadas nga nadawat sa Sun.Star Superbalita kagahapon.

Ang mga ginikanan sa bata nga sila si Haryl Visaya, amahan ug Marifhe Ylaya, inahan nihangyo ni Bernadas nga mohimo og lawom nga imbestigasyon sa kamatayon sa ilang anak sa SAMCH niadtong Hunyo 7, 2015.

Sa tulo ka pahina nga suwat reklamo nga ilang giduso kagahapon sa DOH 7, sila nipasangil nga kon wa pa magpasagad sa ilang katungdanan ang pipila ka mga doktor sa SAMCH, di mamatay ang ilang anak.

Tinguha sa mga ginikanan nga ma-autopsy sa NBI 7 ang lawas sa bata.

Apan si Dr. Rene Cam, medico-legal officer sa NBI 7, siya namahayag nga maglisod sila og tumbok sa hinungdan sa kamatayon sa bata human nga naembalsamar kini ug nalubong na.

Sa samang kalamboan, si Leo Reyes Villarino ang special investigator III sa CHR 7 nga andam ra hinuon sila motabang sa pamilya kana kon mobisita kini sa ilang buhatan.