SUPAK sa pagpalabang sa Bangsamoro Basic Law (BBL) ang kasagaran sa mga mitambong sa forum nga gipasiugdahan sa Artsidyosesis sa Sugbo kagahapon.

Sa gihimo nga exit poll, diin ang mga partisipante sa forum gihatagan og tagsa ka opinion survey form, sila gipangutana kon mosuporta o dili sa BBL, 242 ang nisupak sa balaodnon, samtang 35 ang uyon nga mapasar kini sa Kongreso ug Senado.

Niabot og 277 ang nibotar gikan sa 296 ka mga tawo nga nagparehistro.

Atol sa forum, si kanhi Supreme Court Chief Justice Hilario Davide Jr. ang nipasabot sa mga kaayohan sa gisugyot nga BBL samtang si kanhi kongresista ug gobernador Pablo Garcia ang namulong pagsupak niini.

Matag usa nila giha­tagan og 45 minutos nga mamulong.

Sa iyang pakigpulong, si Davide namaha­yag nga ang 1987 Constitution nagtugot sa paghimo og autonomous region ug ang pagsupak niini makababag sa pagkab-ot sa kalinaw sa Mindanao nga nag-ungot sa pipila ka dekada.

Siya nagtuo nga makab-ot ang hustisya, kalinaw ug kalamboan sa Mindanao kon mapalabang ang BBL.

“The BBL must be understood in the proper context. It is not an ordinary legislation...BBL is the product of the peace agreement,” dugang pagpasabot sa kanhi chief justice.

Si Davide nipasabot karong bag-o di na BBL ang tawag niini kondi Basic Law for Bangsamoro Autonomous Region.

Si Garcia sa iyang ha­big nihulagway nga usa ka “Pandoras Box” ang BBL nga magmugna og peligro nga mga problema ug kagubot sa Mindanao.

“This BBL is very veritable Pandoras Box and will bring a hose of serious and even dangerous problems for our country,” pamulong sa kanhi kongresista.

Siya nidugang ang Kongreso “cannot and must not enact the BBL” tungod kay gidili sa Konstitusyon ang paghimo og laing autonomous region gawas lang sa kasamtangang Autonomous Region of Muslim Mindanao ug Cordillera Autonomous Region.

Matod ni Garcia di mahimong mapasar ang BBL kon di amendahan ang Konstitusyon.

Suma pa niini ang BBL di produkto sa Kongreso kondi ang Philippine peace panel ug Moro Islamic Liberation Front ang nag-andam niini ug igo lang nipirma ang mga kongresista.

Si Ustadz Najeeb Razul, iskolar sa Islamic studies ug nagrepresentar sa Muslim community sa forum, niawhag sa ubang tinuohan nga hatagan og higayon ang BBL nga ilang gituohan nga maoy tubag sa kalinaw nga dugay na nilang gipangandoy sa Mindanao.