GIKOMPIRMAR sa National Bureau of Investigation (NBI)7 nga ila nang naduso ang mga reklamong kriminal ug administratiba batok sa tulo ka mga pulis sa Fuente Police Station subay sa kamatayon sa bata nga si Chastity Mirabilles.

Lakip sa gipasakaan og reklamo ngadto sa buhatan sa Ombudsman Visayas ang kanhi hepe nga si Chief Insp. Wildemar Tiu ug laing duha niya ka mga sakop.

Nagdumili na paghatag og dugang detalye si NBI7 Asst. Regional Director Eric Isidoro human usab nila kini maduso kagahapon.

Apan wa isipa sa Ombudsman Visayas nga usa ka reklamo ang giduso sa NBI tungod kay wa pay affidavit kun pinanumpaang mga pamahayag nga nalakip niini.

Ang tigpamaba sa Ombudsman Visayas, Atty. Maria Corazon Naraja, nikompirmar nga ilang nadawat kagahapon sa hapon ang “transmittal letter” gikan sa NBI 7 labot sa gihimo niining pakisusi sa kamatayon ni Mirabiles niadtong Abril.

Matod ni Naraja nga wa nila kini gilla isip “formal complaint” kay kuwang sa mga pinanumpaang reklamo ug mga affidavit.

Gipasabot niya nga base sa transmittal letter nga gipadala ni NBI 7 Director Ricardo Diaz nga igo lang gipahibawo ang anti graft office sa pagkakompleto na sa ilang imbestigasyon.

Matod ni Naraja nga ilang giisip nga input ang resulta sa imbestigasyon sa kamatayon ni Chastity alang usab sa pagpahigayon sa ilang opisina og linain nga pakisusi.

Kon ilang makita nga dunay mga pulis nga sad-an sa hitabo, hayan ang Ombudsman for the Military and Other Law Enforcement Officers (MOLEO) ang mo­pahigayon sa preliminary investigation.

Tun-an pa sa Ombudsman kon unsa ang buhaton sa nadawat nila nga transmittal gikan sa NBI.