KAKUWANG sa emergency exit, air-conditioning system ug leg room ang nakitang deperensiya sa Maritime Industry Authority (Marina) sa mga fastscraft nga magbiyahian gikan sa dakbayan sa Sugbo ug Bohol.
Kini ang gibutyag ni Vice Mayor Edgardo Labella human sa gihimong pakisusi sa Marina-7 pinangulohan ni Director Nannette Villamor-Dinopol bahin sa pagpakabana sa mga pasahero sanglit ilang nasinati ang kalisod ug kadelikado sa pagbiyahe.
Usa ka representante sa Marina 7 niasoy ngadto kang Labella atol sa ilang panagtagbo sa Police Coordinating and Advisory Council (PCAC) nga positibo ang reklamo sa mga biyahidor bahin sa mga fastcraft.
Ang bise mayor niawhag sa Marina 7 sa pagsuwat sa ilang naobserbahan ug ipadala ngadto sa iyang buhatan aron pormal nga mahimoan og aksyon.
Buot ni Labella nga mausab sa mga tag-iya ang ilang kakuwangan aron di makompromiso ang pagbiyahe sa mga pasahero.
Labaw sa gikabalak-an sa opisyal ang emergency exit sanglit siya nabalaka nga way daling maagian kon adunay emerhensiya nga mahitabo sa fastcraft.