AGAS sa tubig gikan sa sprinkler maoy gibasol sa pagkahugno sa kisame sa Cinema 5 sa Ayala Center Cebu niadtong Lunes pasado alas 8 sa gabii.

Base sa pasiunang imbestigasyon sa mall nga ang pag-leak sa tubig sa sprinkler ang nakaingon sa pagkahugno sa acoustic board sa tungang bahin sa kisame.

Way salida niadtong higayuna kay giabangan kini sa Dreamscape Network Inc., pribado nga kompaniya, alang sa usa ka launching sa bag-ong campaign ad.

Mao kini ang gibutyag sa usa sa mga kawani sa interbyu sa Sun.Star Superbalita sa kondisyon nga di siya nganlan.

Matod niya nga aduna sila’y nadungog nga buto sa wa pa moagas ang tubig nga susama sa waterfalls.

Dugang sa maong kawani nga dugay niresponde ang mall ug gikompirmar usab kini sa chief executive officer sa kompaniya nga si Mark Evans.

Apan sa ilang press statement, gihimakak kini sa mall management.

“The mall’s Emergency Brigade Team had immediately responded to clear and those affected were immediately given medical care,” tipik sa maong press statement pinaagi sa corporate communications manager sa Cebu Holdings Inc. Atty. Jeanette Japzon.

Sa kinatibuk-an, siyam ka mga tawo ang nangaangol.

Lima sa maong mga angol nangalandig sa tambalanan ug naghuwat na lang sa medical clearance aron makagawas.

Gisuwayan pa sa mga tigbalita kagahapon pagpangutana si Japzon apan nagdumili pa kini pagpa-interview tungod kay padayon pa gihapon ang ilang imbestigasyon kabahin sa hitabo.

Gisuwayan usab pagbisita sa Sun.Star Superbalita ang buhatan sa Dreamscape apan matod sa guwardiya nga wa si Evans ug way pwede makatubag kundi siya ra.

Ang hepe sa Mabolo Police Station nga si Police Senior Inspector Hartzel Peter Rosales Bellido nibutyag nga base sa ilang initial nga report, duha ka mga tawo lang ang nakuhaan nila og ngan sa mga nangaangol.

Lakip niini ang na-admit sa Perpetual Succour Hospital nga nakaangkon og head injury nga si Cecilia Ladesa, 26, ug usa ka Ryan Orbe, 31, natambalan ra pinaagi sa first aide.

Naghuwat na usab sila sa report sa imbestigasyon sa mall aron usab makapahigayon sila sa ilang kau­galingon nga imbestigasyon.

Bisan kon nipadala og tawo ang Mabolo Police Station sa mall apan naglisod gihapon pagsulod ang niresponde.

Nasagmuyo usab ang pangulo sa Cebu City Disaster Risk Reduction Management Council nga si konsehal Dave Tumulak dihang dugay nakasulod ang iyang responders sa maong cinema.

Sa interview kang Tumulak sa Aksyon Bisaya kagahapon, niingon kini nga kinahanglan nga aduna’y preventive inspection nga ipahigayon sa matag cinema ug mall dinhi sa dakbayan usa sa usa ka tuig.

Kini aron masiguro nga di na usab mahitabo ang nahitabo sa maong cinema.

Samtang ang mayor sa syudad nga si Michael Rama nagpatawag og meeting karong adlawa inubanan ang CCDRMC, Office of the Building Official ug sa tanang cinema owners aron pagahisgutan ang kaluwas sa ilang mga establisemento.