DI gyud diay mga ordinaryo kining mga terorista nga naa karon sa Syudad sa Marawi. Lalim bay naa na lang sila nagtago sa usa ka gamayng suok sa syudad. Apan naglisod ang atong mga sundawo nga makasulod. Gani, nakabsan pa kita og 13 ka mga Marines.
Kining ingon niini nga panghitabo angay lang moduso sa kasundalohan sa Pilipinas nga hingusgan pa ang ilang mga paninguha.
Sa kadaghan sa mga sundawo lang daan, maglisod kita og hunahuna kon nganong makalahutay pa kining mga terorista nga sakop sa Isis.
Dakong hagit kini sa AFP nga gihatagan ni Presidente Rodrigo Duterte og dakong kahigayunan sa pagpakita sa ilang katakos nga manalipod sa republika.
Ang ako lang madugang nga kining mga terorista, igo lang mopakita nga mosukol pa ug makigbuno pa. Kon makalahutay, makapanghambog sila og kadaugan.
Kon sa sabong pa, kon makatusik pa, di pa sila pildi.
Hinabang
Samtang nakigbugno ang atong mga kasundalohan, duna kitay mahimo sama sa paghatag og mga hinabang alang sa mga namakwit. Kadaghanan kanila naa karon sa Syudad sa Iligan ug sa Cagayan de Oro.
Makadasig nga bisan pa man sa pagsugod pa lang sa mga buto-buto pag Mayo 23, 2017, naa nay mga kaigsuonan nga nagsugod na sa pagtabang sa mga namakwit.
Makadasig ang mga istorya kabahin sa mga Muslim nga nitabang sa mga Kristiyano nga di mahilabtan sa mga terorista. Ug kining mga Kristiyano usab nga kugihan kaayong nag-ateman sa mga bakwit nga kasagaran mga Muslim.
Dalaygon sab kini si Angel Locsin, ang labing unang celebrity nga niadto sa Syudad sa Marawi aron manghatag og mga hinabang uban sa Rural Missionaries of the Philippines (RMP).
Niadto si Angel Locsin nga walay kuyog nga bodyguard.
Kilusang Pagbabago
Duna say gipahigayong #SaveMarawi Relief Campaign nga gibuhat ang Kilusang Pagbabago, ang kalihokan sa mga Duterte supporters.
Matod pa ni Joselito Libres, KP national lead convenor, ilang mga sakop nga Kristiyano ug mga Muslim didto sa Mindanao nagtinabangay alang sa pagsuporta kang Presidente Duterte ug sa republika batok sa mga terorista.
Sa pagkakaron, mga boluntaryo sa KP ang aktibong nagtabang karon diha sa mga evacuation centers sa Iligan ug Cagayan de Oro.
Gibutyag ni Libres ang mosunod nga mga drop-in centers ug contact persons sa tibuok nasud:
u25cf National Capital Region (NCR) – Pwersa ng Masa Para sa Pagbabago, 816 B. Mayor St. Pasay City c/o Lino Reyes – 0927 824 4522
u25cf Visayas – Kilusang Pagbabago Visayas Center, 2/F Opascor Bldg., Benedicto Street NRA, Cebu City c/o Cathy Maluya – 0917 972 2283
u25cf Mindanao – Iliganon Restobar, Palao Iligan City c/o Francis Legaspi – 0975 378 6337
(@anol_cebu sa Twitter)