GISUHID pa karon ang kadagatan sa Caubian Island sa mga divers nga nangita sa patayng lawas ni Mayor Gisela Boniel sa lungsod sa Bien Unido sa lalawigan sa Bohol.
Sumala pa sa mga taho, si Boniel gi-kidnap, gisakay sa pumpboat, gipusil ug ang iyang lawas gitambog sa kadagatan taliwa sa Cebu ug Bohol.
Usa sa mga suspetsado mao ang iyang kaugalingong bana, si Bohol Provincial Board Member Niño Rey Boniel, nga gipasakaan na karon og kasong parricide.
Dunay nangutana kon magpadayon ba ang kaso nga wa pa man makit-i ang lawas sa biktima? Unsa man kining gitawag og “corpus delicti”?
Ang corpus delicti sa Iningles “body of the crime,” ang legal principle nga nag-ingon nga kinahanglan nga probahon nga nahitabo ang usa ka krimen sa di pa konbiktuhon ang usa ka tawo sa paghimo sa maong krimen.
Ang Black’s Law Dictionary nag-define sa corpus delicti nga “the fact of a crime having been actually committed.”
Sa ato pa kon dunay moangkon nga nakapatay, apan wa maprobar nga nakapatay siya, di siya makonbikto sa maong krimen.
Ang Korte Suprema, sa kaso nga Rimorin Sr. versus People of the Philippines (G.R. No. 146481, April 30, 2003) nagkanayon, “Corpus delicti in its legal sense refers to the fact of the commission of the crime, not to the physical body of the deceased or to the ashes of a burned building or — as in the present case — to the smuggled cigarettes. The corpus delicti may be proven by the credible testimony of a sole witness, not necessarily by physical evidence such as those aforementioned.”
Giklaro sa sa Korte Suprema nga ang corpus delicti wa mapasabot nga mao kini ang lawas sa namatay o gipatay ingon di mao ang mga abo sa usa ka building nga nasunog.
Nidugang ang Labawng Hukmanan, “The Court, on several occasions, has explained that corpus delicti refers to the fact of the commission of the crime charged or to the body or substance of the crime. In its legal sense, it does not refer to the ransom money in the crime of kidnapping for ransom or to the body of the person murdered. Hence, to prove the corpus delicti, it is sufficient for the prosecution to be able show that (1) a certain fact has been proven — say, a person has died or a building has been burned; and (2) a particular person is criminally responsible for the act.” (edbarrita@gmail.com)