MGA UV Express vans nga nagbiyahian padulong ug gikan sa norte temporaryong gipaundang pagpamasada human nahitabo ang bangga didto sa Tibungco ning siyudad niadtong Miyerkules sa buntag nga mikalas og 10 ka kinabuhi.
Ang bangga, gikalambigitan sa van sa UV Express ug sa dump truck human kini mi-overtake sa gisundan nga sakyanan.
Ang mando sa Land Transportation Franchising and Regulatory Board (LTFRB) national office gibase sa usa ka resolusyon "to cease and desist from operating" sa tanang UV Express Services nga dunay ruta padulong sa maong lugar.
Sumala sa resolusyon nga daghan nang mga taho ang miabot sa buhatan sa LTFRB-nasyonal nga mga UV Express vans nga nagbiyahian sa lugar nalambigit sa "reckless driving" ug "overspeeding", nga mihatag og peligro sa ilang mananakay. Busa gipatuman ang kamandoan.
Tungod niini, misampol dayon ang LTFRB-Davao Region ug gisikop ang upat ka mga UV Express van kagahapon nga nasakpang nagbiyahe padulong norte nga bahin.
Apan ang pangutana, nganong karon pa man? Tungod ba kay duna nay namatay? Nagpasabot ba kini nga kon way mamatay, okay ra sa LTFRB?
Angay hinumdoman sa ahensiya nga di lang mga drayber sa UV Express ang kaskasero, daghan pang uban diha nga mga depasaherong sakyanan nga mora sab og hari sa kadalanan.
Di lang sa norte nga bahin, bisan padulong sa Toril ug Calinan ning siyudad, dunay daghang kaskasero gihapon nga mga drayber, base sa reklamo sa mga sumasakay sa Toril ug Calinan.
Daghan na ang nahitabong bangga sa mga ruta sa Toril ug Calinan nga mikalas sab og daghang kinabuhi sa milabay nga mga panahon.
Maghulat pa ba ang LTO, LTFRB ug CTTMO nga mokalas na sab og laing mga kinabuhi una sila molihok?