ANG Land Transportation Franchising and Regulatory Board (LTFRB) sa Davao Region nakadakop na og upat ka mga UV Express vans padung sa northbound sa Barangay Lasang, dakbayan sa Davao kagahapon.
Ang pagkasikop sa mga vans gipatuman human ang LTFRB national office nag-order sa pagpagula og resolution to cease and desist ngadto sa tanang mga nag-operate og mga UV Express Services gikan Davao City padung norte nga bahin.
"We call their attention and oblige them to stop at the side of the road. The vans apprehended today and the coming days will be impounded by LTO," sulti ni Virgilio Jebone Jr. sa LTFRB Transportation Development Office kagahapon.
Daghang mga drivers ug operators sa UV Express nga nagbiyahian pa norte nga bahin sa rehiyon ang wala makauyon sa kalit nga pagsuspende sa Land Transportation Franchising and Regulatory Board ilang mga biyahe.
Miyerkules sa hapon human sa duguong bangga sa Kilometro 21, Budbud, Barangay Bunawan, Bunawan District, siyudad sa Davao, ang LTFRB sa Davao region nagpagula og suspension order sa mga drayber ug pasahero sa UV Express nga nagbiyahian sa Davao del Norte, Davao Oriental, Compostela Valley Province, Agusan del Sur ug Agusan del Norte.
Giingon sa mga drivers ug operators nga nakalitan sila sa hukom sa LTFRB gumikan ning kasamtangan wala sila makuhaan nga alternatibo sa ilang pang-inadlaw nga panginahanglan labi na kay naa silay gipa-eskuwela.
Dugang sa mga nahisgutan nga dili sab unta sila apilon sa gumikan dili man sila tanan abusador sa pagpadagan sa ilang mga gipangdala nga unit.
"Dili lang pod unta ming tanan ipang-generalize kay di man tanan driver abusador, seguro sa 100 ka drivers, duha ra niini abusador. Luoy sab mi nga dunay mga gipa-eskuwela, walay makuhaan og balon ug pagkaon sa among mga anak," saysay ni Dominador Suarez, driver sa UV Express padung Maragusan nga nahinabi sa Superbalita sa ilang terminal kagahapon sa GMall of Davao.
Pipila ka mga pasahero sab nagbutyag nga mapugos nalang sila sa pagsakay og bus diin posibleng maapektuhan ang dagan sa ilang pagbiyahe.
Migula ang disesyon sa LTFRB human magbangga ang usa ka pasaheroang van ug forward truck nga gikamatay sa 11 na ka mga pasahero lakip driver ug konduktor niini.
Hinuon, giabaga sa operator sa passenger van nga usa ka municipal councilor sa lungsod sa Montevista ang tanang galastuhon sa pagpalubong sa mga biktima ingon man ang mga gasto sa tambal ug ospital.
Mipasalig sab si Davao City Mayor Sara Duterte-Carpio nga mopadala og hinabang ngadto sa mga biktima.
Sa kasamtangan, walo ang nagpabilin sa ospital samtang misaka na sa 11 ang namatay nga ang duha niini wala pa naila nga anaa karon sa Rivera Funeral Parlor sa Licanan, Bunawan.
Gihikay na sab sa Bunawan Police Station ang pagpasaka og patung-patong nga kaso ngadto sa driver sa forward truck kinsa padayong gitambalan sa Southern Philippines Medical Center.