GITULIS, gikulata, ug gidunggab ang usa ka binatilyo sa wala maila nga mga suspetsado niadtong Lunes sa buntag samtang nagbaklay sa dalan Pabayo-Hayes, Dakbayan sa Cagayan de Oro.

Ang biktima usa ka menor-de-edad ug estudyante hinungdan nga giubanan kini sa iyang inahan nga si Josephine Lagamao, lumulupyo sa Macasandig ning dakabayan ug nagpatala sa buhatan sa kapolisan.

Subay sa report sa Police Station 1 sa Divisoria nasayran nga samtang naglakaw ang biktima sa nahisgutang dapit usa ka lalaki ang miatang kaniya ug nasuta na lamang nga aduna pa kini kauban nga anaa sa iyang likod nga bahin.

Nakurat na lamang kini sa dihang kalit nga gikulata sa maong mga suspetsado ug gani misulay pa kini sa pagsukol hinungdan nga gidunggab kini ginamit ang ice-pick.

Nakaangkon ang biktima og samad dinunggaban sa iyang wala nga kilid ug daling gibiyaan sa maong mga suspetsado nga samaran.

Samtang ang iyang bag gidala sa mga suspetsado nga adunay sulod cellphone ug sinina.

Sa pagsulat niini nga balita ang maong insidente ang nakatala na ngadto sa kapolisan sa PS1.(KCS)