NADALA sa duha ka wala maila nga suspetsado ang kwarta, importanteng gamit, ug motorsiklo sa usa ka lalaki Martes kaadlawon sa Rotonda, Macasandig, Dakbayan sa Cagayan de Oro.
Giatangan sa duha ka suspetsado si David Dela Cerna, lumolupyo sa El Salvador City, Misamis Oriental.
Subay sa biktima nga samtang naghatod siya sa iyang barkada kinsa nanimuyo ning siyudad kalit kining giatangan sa mga suspetsado ug gitionan sa gituohang kalibre.45.
Gidugang pa nga kalit kini nga miingon nga ipahunong kay kung dili pusilon kini hinungdan nga malampusong nadala sa maong mga suspetsado ang tablet, cellphone, P1 ka libo kapin lakip na ang motorsiklo niini nga XRM 125.
Sa pagsulat niini nga balita, padayon pa nga gawasnon ang mga wala maila nga suspetsado. (KCS)