MATAG ikatulong Domingo sa Hunyo gi-saulog ang Father’s Day. Ang amahan maoy gi-ila nga haligi sa panimalay. Siya maoy gi-ilang provider ug protector sa matag pamilya. Siya maoy naghatag sa tanang panginahanglan sa iyang sakop sa pamilya labi pa sa iyang mga anak. Siya maoy magmatuto kanila sa insaktong pamatasan.
Gihimo sa amahan nga adlaw ang gabii aron makahatag sa panginahanglan sa iyang pamilya. Aron mahatagan kini og maayong kaugmaon. Bahala na siya maoy magutman ug magkasakit basta dili lang ang iyang mga anak. Andam niyang isugal ang iyang kinabuhi aron lang ka-protektahan ang iyang mga anak batok sa gustong mopasipala niini.
Diin man magsugod ug kinsa ang nakadiskobre sa selebrasyon sa Father’s Day? Didto kini magsugod sa Spokane, Washington sa YMCA niadtong 1910 pinaagi ni Sonora Smart Dodd nga natawo sa Arkansas. Ang unang selebrasyon gipahigayon sa Spokane YMCA niadtong June 19, 1910. Iyang gihatagan og pasidungog ang iyang amahan nga si William Jackson Smart, usa ka civil war veteran, nga maoy nagmatuto ug mi-atiman kang Sonora ug sa laing unom niya ka mga igsuon. Ipahigayon gyud kini matag ika-tulo nga Dominggo sa buwan sa Hunyo.
Niadtong 1966, si US President Lyndon B. Johnson mi-isyo og first presidential proclamation nga nag-honor sa mga amahan matag ika-tulong Dominggo sa Hunyo. Human sa unom ka tuig, ang maong okasyon gihimo nang permamente nga national holiday pinaagi sa presidential proclamation ni President Richard Nixon niadtong 1972.
Mas unang gisaulog ang Mother’s Day kay sa Father’s Day. Mao nga didto makahuna-huna si Sonora nga kon adunay Mother’s Day, nganong wala may Father’s Day? Busa iya kining gihimong advocacy ug daghan ang misuporata sa iyang kawsa. Midoul sila og mga pulitiko sa Estados Unidos nga maoy misuporta sa ilang advocacy. Niadtong panahona wala pa gyuy opisyal nga balaod nga nagdeklarar sa Father’s Day apan nahimo na kining significant nga selebrasyon nga gisagop sa ubang kanasuran apil na dinhi sa Pilipinas isip pasidungog sa mga amahan sa tibuok kalibutan. Happy Father’s Day sa tanang mga Daddy, Papa, Tatay ug Itay. (bobbygnalzaro@gmail.com)