Dear Noy Kulas,
Tagoa lang ko sa ngan nga Junior. Ang akong problema mao ang kahasol sa akong tanlag kay naa koy nadiskobrehan bag-o lang. Parte ni sa barkada sa akong papa ug among silingan nga babaye.
Kini silang duha, pulos minyo. Ang pamilya sa lalake among suod kay barkada lagi ni Papa sukad pa sa high school samtang kining babaye among silingan. Ako silang nasakpan sud sa sinehan kay naatol nga nitan-aw ko sa same nga lugar. Kaingon nako og gimata-mata ra ko. Sila man gyud ang nanulod, nag-holding hands. Nag-kiss kiss pa ang duha nga pina-smack atol sa salida.
Nanggawas ni silang duha ug akong gisundan pagawas. Nag-iyahay sila og sakay og taxi. Wa na ko kahibawo asa sila padung. Sure wa sila kabantay nako samtang naglinya pa mi kay nagpasalipod ko sa ubang mga tawo.
Unsa may akong buhaton? Mosumbong ko kang Papa? Di kaha sila maguot kon badlungon ni Papa ang iyang barkada? Please tambagi ko.
JUNIOR
Jun,
Nakasabot ko sa imong kahasol kay suod ninyo ang pamilya. Sa ato pa, barkada sab tingali nimo ang mga anak nianang amigo sa imong amahan. Natural lang nga malain kay maora nag part sa inyong pamilya. Ang imong mabuhat niana mao ang pagsulti sa imong amahan sa imong nakit-an. Naa ra sa imong amahan kon unsay iyang buhaton, iya bang badlungon ang iyang amigo o iyang pasagdan.
Sa atong batasan o kultura nato, mahadlok kita nga manghilabot sa kinabuhi sa uban. Mahadlok kitang ma-offended ang atoang higala ug maguba ang panaghigalaay. Pero para nako, ang tinuod nga higala mobadlong gyud, moprangka sa suod nga tawo aron makorihian ang sayop. Makaguba na og pamilya ang iyang gibuhat.
Kon makasulti ka na sa imong amahan, ayaw na kahasol kay ang pagsulti di na imohang responsibilidad, iyaha na. Naa ra sa imong amahan kon unsa ang iyang pagabuhaton. Di mo ka level sa iyang barkada kay maguwang ni nimo. Ang imong amahan mao ang naa sa mas hustong posisyon.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com