NAKUHA gayud ni Mayor Rody Duterte ang imahinasyon sa katawhang Filipino nga mamahimong pangulo sa Pilipinas.

Samtang nagpabiling nagmakuli sa pagsalmot si mayor sa pagkandidato pagka-presidente, wala kini nakapugong sa katawhan ilabi na sa Mindanao ug Kabisay-an nga hagiton si Mayor Rody nga modagan pagka-presidente sa 2016.

Usa na lang gayud ang kulang ni Mayor Rody nga katarungan aron siya makombinse nga mokandidato sunod tuig, kini mao ang iyang gastuhon kay kon modagan karon nga labing taas nga posisyon sa nasud, nagkinahanglan ka kuno og napulo ngadto sa kinse ka bilyon ka pesos.

Kay wala man siya ining kantidara. Kung ang usa sa mga katarungan niya mao ang makinaryas, sa tinuod lang Mayor Rody kinasing-kasing nga pagboluntaryo ang bukas nga ihatag sa katawhan. Basi'g ang mahitabo pa gani ron tanang grupo boluntaryo nang molihok para niya.

Sa tinuod lang, nganong gusto na gayud sa katawhang Filipino nga siya ang pangulo sa nasud? Kay ang numero unong suliran sa mga mayor sa nasud ron mao ang grabeng pagkatag sa ilegal nga druga. Ug sa tan-aw nila kon mapangulo si Duterte, siya lang ang makasabot sa lihok sa mga mayor ug kapulisan nga masumpo kini.

Kaniadtong milabay'ng adlaw, pinasidunggang mamumulong si mayor sa San Francisco, Agusan del Sur sa 20th Caraga Business Conference Trade Fair sa San Francisco Farmers and Youth Training Center.

Nagdala kini tema nga "Managing Resources Towards Asean artnership and Competitiveness."

Punting sa maong tigum aron matubag ang hagit ug oportunidad sa rehiyon uban sa silingang nasud sa Southeast Asia.

Dinhi ning maong pulong gi-ingon ni Mayor Rody, "I have been everywhere, lahat ng mayors nakausap ko, I ask them what is the problem, they tell me 'Rod, drugs'."

Matod pa gani ni mayor nga nagbaha na kuno ang shabu sa merkado gumikan kay dali ra kaayo kining gamaon. Ang kulba kay kining mga sindikato daling makasulod kay makurap nila ang tanan.

Sa iyang paglingkod isip mayor sa Dakbayan sa Dabaw, iyang gisaad sa katawhang Dabawenyo, "I will restore order and sanity in the city." Ug tuod man, natuman kini.

Ang Davao City mao karon ang ikasiyam nga labing malinawong lugar sa tibuok kalibutan, ika-upat sa Asya ug nag-una sa nasud.

Kini ang hinungdan nganong dili na gayud pabalibad ang katawhang Filipino kang Mayor Rody nga moadagan pagka-presidente.

Ikaw pabalibad ka?