COMPOSTELA VALLEY -- Daghan ang nagtuo nga gimik lang ang pagsige og balibad ni Mayor Rodrigo Duterte nga modagan sa pagka-presidente sa nasod sa 2016.
Kini gumikan kay daghan ang nanggawas na karon nga advertisement sa telebisyon, newspaper o bisan sa social media.
Si alyas Anoy, mag-uuma nga taga lungsod sa Compostela, misulti sa Sun.Star SuperBalita nga siya nagtuo nga ang gihimo ni Mayor Duterte nga di modagan pagka-presidente sa Pilipinas usa sa iyang mga estratehiya.
Giklaro ni Anoy nga napul-an na siya og paminaw sa kanunay'ng pamalibad ni Duterte apan wa say hunong ang mga TV advertisement sa mayor.
Ang maong estilo sa politika, suma pa ni Anoy, iya nang nasinati kaniadto sa lungsod nga iyang gibiyaan una pa siya nahiabot sa Compostela.
"Sa una bitaw, may konsehal sa among baryo, nagplano nga molansar pagka-kapitan, ug aron nga siya mapansin, nangbayad siya og mga tawo nga mao kunohay mopugos kaniya pagpadagan pagka-kapitan ug mao'y nagsige'g pangampanya kaniya bisan layo pa ang eleksiyon, samtang siya sad nagpadili-dili, apan way hunong ang pagpanghatag donasyon sa nagkalain-laing Purok ug sa dihang nagkaduol na ang piniliay diha pa siya misulti nga magpapili siya pagka-kapitan," asoy ni Anoy.
Si Delpen sab nga usa ka negosyante og cellophane nga taga Dakbayan sa Tagum diin nagabiyahian sa Comval nagkanayon nga sukad pa sa sinugdan, dako na siyang uyon ug boto kung molansar pagka-presidente si Mayor Duterte.
Apan matod niya kon magsige og balibad ang mayor, mahimong makadismaya ug moabot sa punto nga mawad-an na siya'g gana nga mobotar niya.
Usa sab ka empleyado sa pribadong kompaniya sa siyudad sa Davao kinsa molupyo sa Comval nga wa magpaila misulti nga niadtong panahon nga gipahigayon ang fun run aron awhagon nga modagan ang mayor nga modagan, usa siya sa wa miapil sanglit sa iyang huna-huna nagkapoy–kapoy lang siya sa pag-apil nga sa tinud-anay modagan man gayud ang mayor ug ang tanan apil sa script nga gimugna alang sa pagdagan ni Duterte.
"Naglaum ang katawhan nga unta undangon na ang drama sanglit puol nang paminawon nga sa kaulahian motumaw man gyud ang matuod," niya.
Nanghinaut sila nga unta si Mayor Duterte dili na magpa-over acting kay basin sa kaulahian daghan na unyang mga tawong mapul-an ug mawad-an og gana nga mobotar kaniya. (DTV)