USA ka kanhi mayor sa usa ka lungsod sa Bohol dunay pangutana.
Naunsa na man tong kaso nga may kalabotan si kanhi Kongressman ug karon Gobernador Edgar Chatto diin ilang gipagawas nga “livelihood training kit” kunohay nga gipanghatag apan milutaw nga binuang diay?
Nganong binuang man?
Tungod kay ang mga tawo nga nalista nga nakadawat sa maong “livelihood training kit” migawas nga patay na diay, dili taga-diha sa maong lugar o deretso nga mibalibad nga wala gyod sila makadawat.
Interesado ang mayor nga mahibalo sanglit siya ang kinaunhan nga mayor nga mi-isyo og certification nga “fictitious, non-existent or non-resident” ang mga tawo nga nalista isip “beneficiaries” sa maong livelihood training kit.
u2022 • •
Dugay na kini nahitabo.
Panahon pa kini nga congressman pa si Chatto sa 1st District sa Bohol.
Sanglit kataposan na man niya nga termino karon isip gobernador sa Bohol, nagpasabot nga sobra sa 10 ka tuig na ang maong hitabo apan wala pa gihapoy resulta ang imbestigasyon sa maong kaso.
u2022 • •
Matod pa sa maong mayor, dako-dako ang kwarta nga gigahin sa maong livelihood project gamit ang pork barrel ni Chatto.
Angayan lang nga tinud-on ang pag-imbestigar sa maong kaso, matod pa niya sa dihang nagkita mi atol sa kasaulogan sa Fathers Day.
Midugang pa siya nga ang maong kaso susama sa mga pork barrel nga mga kaso ni Janet Lim Napoles.
Kon gitininuod sa gobierno si Napoles, walay rason nga dili tinud-on si Godofredo Roque, dugang pa niya.
u2022 • •
Gi-withdraw sa mga abogado ni BM Nino Boniel ang ilang gi-file nga petisyon nga Habeas Corpus didto sa RTC Talibon.
Ila kining gihimo sanglit wa nay hinungdan pa ang maong petisyon sanglit duna na may duha ka kaso nga gisang-at batok ni BM Boniel ug duna nay legal nga rason nga presohon si BM Boniel.
Ang gi-isyo sa korte nga order nga pabuhian si BM Boniel wala mapahimusli sanglit wala man motuman ang kapolisan sa rehiyon og nagpabilin sa presohan si BM Boniel.
Saon man ang order kon dili tumanon?
u2022 • •
Nagakadugay ang pagpangita sa patay nga lawas ni Mayor Gisela Boniel, nagakahanap usab ang posibilidad nga makit-an pa kini.
Onse na ka adlaw ang milabay sukad gibalita nga gitambog ang iyang patayng lawas apan hangtod karon, wala pa gyod kini makit-i.
Daghan ang mga butang nga pwedeng mahitabo.
Mahimo nga gianod kini sa layo nga dapit.
Mahimo nga gikaon na kini sa mga isda sa dagat, apil na ang iho.
Mahimo sab nga dili tinuod nga gihulog kini sa dagat.
u2022 • •
Giingon nga ang driver ni BM Boniel misurender kagahapon sa mga kapolisan.
Unsay buot ipasabot niini?
Mosulti ba kini siya sa kalambigitan ni BM Boniel?
Mosulti ba kini nga walay kalabotan si BM Boniel?
Unsay rason nga mi-surender man kini siya?
Kon nahadlok siya sa iyang kinabuhi, kinsa may nagplano nga patyon siya?
u2022 • •
Dihay panahon sa una nga ang usa ka doctor sa usa ka ospital sa Tagbilaran nalambigit sa druga.
Surgeon ang maong doctor og daghan siya og mga suki nga mga pasyente.
Nagpasabot lang kini nga hanas og kasaligan siya sa iyang trabaho.
Mao kini hinungdan nga popular siya.
Apan duna siyay sekreto.
Tig-gamitan siya og shabu tungod kay matod pa niya, gikinahanglan niya ang shabu aron mahimo niya nga mag-opera sa dugay dugay nga panahon.
Dugang pa niya, kanang mag-opera siya sulod sa 5 ngadto sa 10 ka oras, nagkinahanglan siya ug kusog og kinahanglan dili siya kapoyan.
Sa iyang pag-gamit sa shabu, iyang napamatud-an nga makaya niya ang pag-opera sa taas taas nga panahon.
Mao kini hinungdan nga kanunay na siya mogamit og shabu.
u2022 • •
Mao usab kini ang gigamit sa mga sakop sa Maute sa giyera karon sa Marawi.
Ang mga Maute mogamit og shabu panahon sa gubat.
Unsay rason niini?
Aron dili sila kapoyan ug dukaon samtang makig-kombate sila sa mga sundalo sa nasod.
Mao kini hinungdan nga daw robot ang ilang kontra sa gubat; sama ang mga Maute og mga tawo nga way kapoy kapoy sa gubat.
Mao usab kini hinungdan ngano nga daghang mga drayber karon ang nagsugod na ug gamit sa shabu sa mao gihapon nga rason.
Unsaon kaha pagsumpo niini kon magtuo ang mga tawo nga ang shabu makahatag og dugang kusog og mawala ang kakapoy kon mogamit niini?