ADUNA nay bag-ong huwes nga naghupot sa kaso bahin sa pagpatay sa mamahayag nga si Nestor Bedolido niadtong Hulyo 2010.
Gitakda dayon ang arraignment sa mga gi-akusahan nga sila kanhi Davao del Sur Governor Douglas Cagas ug Matanao Mayor Vicente Fernandez Jr. sa Hunyo 23.
Sa gipahigayong clarificatory hearing niadtong Martes sa hapon, si Judge Loida Kahulugan sa Regional Trial Court Branch 21 nagmando nga ibalhin si Fernandez gikan sa selda sa Matanao Police Station ngadto sa Provincial Rehabilitation Center (PRC) sa Mati, Digos City.
Gitugtan sab sa huwes nga ipahigayon ang pagdungog sa kasong motion to bail sa mga akusado sa Agosto 4, 11 ug 18.
Samtang ang mi-angkon nga maoy nagtipi sa biktima nga sila si Voltaire ug Henry Mirafuentes nagtudlo nila ni Cagas ug Fernandez nga mao'y nagpapatay kang Bedolido.
Si Bedolido mao'y kanhi kaalyado ni Cagas kaniadto sa mantalaan niining Digos Times.
Una nang gitaktak sa mga government prosecutors ang kaso apan si Justice Secretary Leila de Lima nagmando nga subling iduso ang kaso sa miaging tuig.
Apan sila Cagas ug Fernandez nagpabiling inosente sa kaso, hinungdan nga boluntaryong mitahan.
Si Cagas gikustodiya sa Bureau of Jail Management and Penology's district jail sa Digos.
Sa paghupot ni Kahulugan, naglaum ang prosekusyon ug depensa nga hingpit nang makapaguwas og resolusyon ang korte.
Gitakda sab ang pormal nga pagdungog sa kaso sa bulan sa Septyembre. (Dondon Dinoy)