IKIHA ang tag-iya sa refilling station sa butane sa Barangay Bangbang, lungsod sa Cordova, Sugbo sa dihang mga silingan nalisang sa pag-ulbo sa tanke sa liquified petroleum gas (LPG) samtang nag-refill og butane canister niadtong Dominggo.
Ang maong reklamo gibase sa provincial ug municipal ordinance sa Cordova nga nagdili niadtong mag-refill ug pagpamaligya og LPG nga gisulod og butane canisters, ilabi nga kalapasan usab kini sa Presidential Decree 1865 nga nagdili sa pagbaligya og produktong petrolyo nga maghatag og kakuyaw sa publiko.
Si SP01 Eleazar Llanes nagkanayon nga wa lang una nila ibalhug sa bilanggoan si Jonathan Sobrepeña, tag-iya sa maong refilling station, aron nga kahatagan og higayon nga makaduso sa gipangayo nga permit o clearance gikan sa Department of Energy (DOE).
Gisakmit ang tora-tora nga service vehicle ni Llanes, 15 ka tanke sa sa LPG nga adunay tag-50 kgs. ang gibug-aton lakip na ang 357 nga basiyo sa butane niadtong Hunyo 18.
Asoy ni Llanes sa Superbalita Cebu nga ila nang gipanghimangnoan kaniadto si Sobrepeña kalabot sa iyang negosyo sa dihang ang lungsod sa Cordova mihigpit niadtong refilling station ug retailers sa butane resulta sa sagunson nga insedente sa sunog ug gitumbok nga hinungdan ang refilled butane canisters.