DUHA ka pulis nga sakop sa Davao City Police Office (DCPO) ang nahatagan og pahalipay nga "trip to Hong Kong" sa ilang maayong perpormans nga gipakita sa pagsumpo sa ilegal nga druga sa dakbayan.

Ang duha ka pulis sila si drug enforcement officer Michael del Rosario sa Philippine Drug Enforcement Agency (PDEA) ug si San Pedro Police Station chief of police, Senior Inspector Ronald Lim Lao.

Mismong si Davao City Mayor Rodrigo Duterte ang mipahibawo niini atol sa ika-13th anniversary sa PDEA-Davao niadtong Martes didto sa covered court sa Camp Domingo Leonor.

Sila si del Rosario ug Lao gihatagan og pahalipay pinaagi sa ilang pagpanguna sa pagsumpo sa ilegal nga druga sa dakbayan.

Si del Rosario maoy nanguna sa pagsikpaw sa mga dagkong tawo nga nagpayuhot og druga sa rehiyon, samtang si Lao ang nanguna sa ilang sunod-sunod nga drug bust sa area of responsibility sa sentrong bahin sa dakbayan.

Sa maong insentibo, ang duha ka pulis nagpasalamat sa ilang mga kaubanan sa intelligence ug sa katawhan nga makonsiderang dunay dakong papel sa paghatag og impormasyon kanila aron mapahigayon ang mga operasyon. (JPC)