UNSA gyud kaha ang estado sa relasyon ug kaminyoon nila ni Lapu-Lapu City Mayor Paz Radaza ug kanhi Mayor ug kongresista Arturo “Boy” Radaza? Nagbuwag na ba kini sila? O nagtipon gihapon sa usa ka panimalay apan wala may maayong pagtinagdanay? Mitumaw kining maong mga pangutana nunot niining sibaw kaayong balita nga gusto modagan si Boy pagkamayor sa sunod eleksiyon bisan kon aduna pay usa ka termino nga nahibilin si Mayor Paz. Hinuon, wala may labot ang lungsod kon nagbuwag na sila kay ila man kanang personal nga problema. Apan kining interes ni Boy nga molansar maoy makapa-intriga sa ilang relasyon ug sa pulitika diha sa dakbayan sa Lapu-Lapu.
Nganong mipakita man og interes si Boy nga mobalik sa City Hall? Nganong dili man niya tugutan nga mahuman ang termino ni Paz? Unsa ba gyud ang personal nga interes sa bana nga dili man niya respituhan ang iyang asawa? Wala nay makapilde nila diha kay ila na karong daynastiya. Apan kon mangkabangga sila, mabuak ang ilang mga supporters og mamahimo silang kataw-anan. Tiaw nimo nang bana ug asawa magka-engkuwentro sa pulitika. Bati kaayo paminawon.
Pasingit
Kagahapon, nunot sa pagsaulog sa ika-54 nga kasumaran sa Charter Day, nagpahigayon og boodle fight ang city government diin gitambungan sa mga lokal og barangay opisyal ingon man sa ubang mga kawani sa kagamhanan. Matod pa kadtong maong kalihukan pagpakita nga na-usab na ang pagpadagan ug pagdumala sa kagamhanan sa maong dakbayan. Wala nay kurapsiyon. Dili sama kaniadto.
Kon mao kining estoryaha, kinsa man ang gipasingitan niini? Dili kaha ang kanhi administrasyon ni Boy Radaza kay siya man ang nahimong mayor sa wala pa si Paz.
Dugay na man tong mga administrasyon sa mga Patalingjug ug sa mga Wiegel. Wala man usab malilong nga ang nag-unang mga isyu diha sa Lapu-Lapu sa panahon ni Boy mao man ang kurapsiyon. Dili lang sa mga government projects sama niadtong lamp post kon dili sa pribadong sektor. Daghang mga negosyante ang mitiyabaw kay matod pa gipangkilkilan. Daghang negosyante ang wala modayon sa pagbubo og investment diha kay gipangayoan nang daan. Karon, in fairness ni Mayor Paz na-usab na baya ang imahin sa Lapu-Lapu.
Ang paglambo kaha sa Lapu-Lapu ang rason nganong na-engganyo nga mobalik si Boy kay nawani na siya sa passing? Kon mobalik siya, dili na usab kaha mangahadlok ang mga negosyante?
Matod pa sa tinubdan nga mabahin-bahin ang mga kaalyado sa mga Radaza diha sa konseho ingon man ang mga barangay kapitan. Porbida gyud ning pulitika no, bisan bana og asawa mag-away. Magkatawa ani sila si Efrain Pelaez ug Angel Rodriguez kinsa gusto pod magpabilin sa pagka mayor.
(bobby.nalzaro@yahoo.com)