GIPANGBUNTOG sa Rain or Shine Elasto Painters ang Kia Carnival, 94-90, aron irehistro ang ikalima nilang sunodsunod nga kadaugan sa premirong duwa sa Philippine Basketball Association (PBA) Governor’s Cup kagahapon sa Araneta Coliseum.

Ang Elasto Painters nag­­­gunit na karon og 6-4 nga rekord ug nakapatong na kini sa ikaupat nga dapit diin kauban nila ang GlobalPort Batang Pier.

Samtang ang Carnival nahagbong sa 4-5 nga baraha diin ilang gikauban sa ikaunom nga luna ang Purefoods Star Hotshots.

Ang kadaugan sa Elasto Painters gipangulohan sa ilang import nga si Wendell McKines pinaagi sa iyang 24 puntos ug 20 rebounds.

Si Paul Lee niamot og 20 puntos ug perpektong 10 ka freethrows alang sa kadaugan.

Sila si Lee ug McKines nakadawat og igong suporta gikan sa ilang mga kauban hilabi na gikan kang Jireh Ibanes aron pagposte og 59-46 nga labaw sa 3rd quarter.

Sa pagpangulo sa higante nilang import nga si Hamady N’Diaye, ang Carnival nakamugna og 20-4 nga rally aron ilugon ang labaw, 66-63, sa hinapos nga bahin sa 3rd quarter.

Hinuon nabawi ra dayon sab Elasto Painters ang labaw, 68-66, pagtiklop sa quarter pinaagi sa mga puntos nila ni Gabe Norwood ug McKines.

Sikit na ang kombati gikan niini apan nagkalig-on ang Elasto Painters sa hinapos nga bahin alang sa kadaugan.

Ang Carnival gipangulohan ni N’Diaye pinaagi sa iyang 31 puntos ug 21 rebounds.

Puntos matag usa:

Rain or Shine 94 –Mckines 24, Lee 20, Uyloan 8, Cruz Jco. 8, Ibanez 7, Belga 7, Almazan 6, Quinahan 5, Norwood 3, Tiu 3, Cruz Jvy 2, Chan 1.

Kia 90 — Ndiaye 31, Dehesa 19, Buensuceso 7, Nuyles 6, Chang 6, Yee 6, Bagatsing 6, Revilla 4, Avenido 3, Alvarez 2.