ADUNAY mikatap karon nga intelligence report nga ang mga teroristang grupo mohimo og pagpangataki sa dagkong mga siyudad sa nasud apil na ang Cebu City karong Hunyo 30. Nabutyag kining maong plano sa mga terorista pinaagi sa dokumento nga nakuha sa Philippine National Police (PNP). Apan ang PNP nagkanayon nga ila pang i-validate ang taho. Dili pa makonpirmar sa kapulisan.
Matod pa, ang dokumento nagbutyag nga ang ISIS, Maute Group ug Bangsamoro Islamic Freedom Fighter (BIFF), nagkahiusa aron molusad sa pagpangataki. Usa sa ilang target ang mga oil depot o pag-hijack ug oil tankers aron i-dasmag ngato sa buildings, shopping malls o tapukanan sa daghang mga tawo. Aduna kunoy bag-ong mga graduates sa mga teroristang grupo nga gi-train sa gawas sa nasud ang mohimo ini. Gawas sa Maute Group nga nakig-gubat sa puwersa sa gobiyerno didto sa Marawi City, ang BIFF nang-hostage usab sa Pigcawayan, North Cotabato.
Porbida no, kon tinuod man gani kini, angay kitang magbantay gumikan kay kon simbako languyon pito ka lawod, makahatag kini og dakong danyos. Nakadungog na kita sa mga binuhatan sa mga terorista sa ubang nasud. Bomba didto, bomba diri. Aduna pay suicide bombings.
Pero kon tinuod kining maong taho, nganong aduna may petsa sa pagpapangataki?
So, kay aduna may petsa mahulog kini og coordinated attack. Matinuod man o dili, gikinahanglan nga magbinantayon kita labi pa ang atong mga awtoridad. Kay nahitabo na kini dinhi sa ato.
Kon nahinumdom mo niadtong Rizal Day bombing pipila ka tuig na ang nakalabay, ubay-ubay ang mga bomba ang mibusikad sa maong adlaw didto sa kaulahan. Aduna gani toy sakop bomb disposal team sa kauluhan ang nabuthan.
Dako og papel ang publiko niini aron mapakgang kining maong yawan-ong binuhatan. Gawas sa atong mga awtoridad, kapulisan ug militar, ang security guards nga maoy first line of defense dako og ikatampo alang sa atong siguridad. Busa di dayon nato isalikway kining maong hulga. Kon aduna koy makita nga kadudahang mga tawo itaho dayon sa kapulisan.