TALIWALA sa kapakyasan sa Cleveland Cavaliers sa National Basketball Association (NBA) Finals, ang ilang mga sumosunod padayong ninghangop kanila ug nagmalaumon nga sa sunod tuig makab-ot na nila ang tumoy sa kalampusan.

Ang mga sumosunod sa Cavaliers nagtuo nga sa pagpangulo ni LeBron James, ang nagasidlak nga tropeyo sa kampiyunato ilaha na gyung maangkon sa sunod nga season sa NBA.

“I believe next year they’ll have a better chance,” asoy sa usa sa mga sumosunod sa Cavaliers nga si Jeff Bentley. “We’re used to next year anyway.”

Wala’y nasayod kon unsa’y dangatan sa Cavaliers dihang mianunsyo si James nga mobalik sa team human sa upat niya ka mga tuig sa Miami Heat. Adunay mga naglaom nga sa pagbalik ni James, kinsa lumad nga taga Cleveland, nga makakombati na pagbalik ang Cavaliers.

Human sa mangil-ad nilang pagsugod sa karon nga season, si James nakadawat og saktong suporta gikan sa iyang mga kauban ug yano silang nakaabot sa playoffs.

Apan gisungog ang Cavaliers sa panahon gumikan kay nawala kanila ang ilang duha ka mga sinaligan, una si Kevin Love dayon si Kyrie Irving.

“One man can’t beat five guys,” matod sa laing sumosunod sa Cavaliers nga si Aaron Edwards. “LeBron wanted this more than anybody.” (AP)