ISIP lakang sa pagpahugot sa seguridad batok sa mga terorista ug ubang dautang elemento, ang Coast Guard (CG) mobile station sa dakbayan, ang Pasil Fish Port sa Cebu City.
Gisugdan na niadtong nakalabay nga adlaw ang pagtrabaho sa detachment office sa maong pantalan aron pagseguro sa mga motorbanca nga modunggo sa dapit.
Matod ni Konsehal Dave Tumulak, chairman sa Committee on Public Order and Safety, nga sugod Hulyo 1, kinahanglan na nga i-rehistro sa tag-iya sa mga bangka nga ubos sa 3 gross tonnage ang ilang sakayan aron dili kini maisip nga kolurom.
Kini tungod kay sugod Agusto, strikto na nila nga ipatuman ang balaod ug posible nga madakpan kadtong wala marehistro ug dili kini makadunggo sa Pasil Fish Port.
Tumong usab sa maong opisina ang environmental protection, marine protection, human ug drug trafficking prevention, maritime law enforcement, safety ug security ug panagang usab kini sa hulga sa terorismo.
Inubanan sa PCG ang Philippine National Police, bantay dagat ug mga barangay sa maong dapit aron protehian ang Pasil Fish Port.
Tumong
Sigon ni Tumulak nga usa sa tumong sa environmetntal protection aron dili na labayan og basura ang kadagatan aron mahibalik ang kalimpyo sa dapit.
Gipasabot usab sa konsehal nga gisiguro nila kini isip panagang sa hulga sa terorismo, illegal nga drugas ug uban pang kontrabando nga anha i-agi sa kadagatan.
Nag-awhag ang konsehal sa katawhan nga tabangan ang law enforcement agencies sa pagpatuman og seguridad sanglit alang kini sa kaluwasan sa tanan.
Samtang si Chief Petty Officer Alejandro Pamot, sa Sub-station Commander Aduana, nagkanayon nga sa pagkakaron duha pa lang ka tawo ang naa sa maong detachment office apan gipaabot nga madungagan kini kon mahuman na ang pagtukod sa ilang opisina sa dapit ug 24 oras na silang makabantay.
Mihangyo ang coast guard sa siyudad nga tabangan sila sa materyales nga ilang gikihanglan aron mapadali ang ilang trabaho.
Si Cebu City Mayor Tomas Osmeña niingon nga si Presidential Assistant for the Visayas Michael Dino unta, matod pa, ang moatiman sa hangyo sa Coast Guard nunot na usab sa pag-umol niini og task force nga magprotehiar sa kadagatan nga nag-uwang sa Kabisay-an ug Mindanao.
Hinuon, daon sa mayor, paminawon niya ang hangyo sa Coast Guard alang sa kasegurihan sa dakbayan.