MAS nisaka pa ang gidaghanon sa pamilya nga gustong mosagop sa mga delegado alang sa umaabot nga ika-51 nga International Eucharistic Congress nga ipahigayon dinhi sa Sugbo sunod tuig.

Kapin sa 300 na ka mga pamilya ang nalista sa Archdiocese of Cebu kinsa mao ang nangulo sa maong kalihokan.

Matod ni Msgr. Ruben Labajo sa Pilgrim-Accommodation Committee alang sa IEC, nga adunay 23 na ka mga parokya ang nihatag kun nitanyag sa ilang host families.

Dugang niini nga matag host family adunay duha ka mga delegado ang ibutang niini ingon man ang pa-istaron sa maong panimalay sa tibuok kalihokan sa maong congress o usa ka semana.

Sa pagkakaron adunay sumatotal 905 ka mga host families ang ilang nasuta nga andam magpapuyo sa mga delegado base usab sa lista sa matag parokya.

Usa ang St. Joseph diha sa Mabolo ug ang St. Therese sa Lahug nga aduna’y labing daghan nga host families nga parehong anaa’y 75 ka mga pamilya.

Nitataw usab si Labajo nga tumong nila ang 1,000 ka mga host families diin 2,000 usab ka mga delegado ang pwede mo-istar niini.

Sagad usab sa mga delegado nga gusto mo-istar ngadto sa host families kadtong kuwang ang budget ingon man nga mga taga nasod sa Pilipinas ra usab gikan ug kadtong mga langyaw nga gusto masinati ang kinabuhi sa host country.

Usa sa hagit karon sa simbahan ug sa mga host families kining gidugayon nga pag-istar sa mga delegado diin sulod kini sa usa ka semana ug ang pagkaon sa mga delegado.

Matod ni Labajo nga nisugyot sila ngadto sa mga parokya nga sila nalang mopakaon sa matag pamahaw sa mga delegado aron dili usab kini bug-at ngadto sa host family.

Nisugyot usab sila ngadto sa mga parokya nga wala maapil sa host families nga sila ang moabag sa pagkaon sa mga delegado.

Ang secretariat sa IEC nga si Margie Matheu nibutyag kagahapon nga ang pagpangita og mga host families kinahanglan kini og request gikan sa obispo o arsobispo sa lugar kon diin gikan ang delegado.