Araw ng Matanao giduyogan sa opisyal sa LGUs ug barangay

MATANAO, Davao del Sur -- Miduyog ang nagkadaiyang ahensiya sa lokal ug nasyonal nga kagamhanan, apil ang mga opisyal sa tanang barangay ug lungsod atol sa kulminasyon sa ika-60 anyos nga kasumaran sa Matanao Huwebes, Hunyo 22.

Gipangunahan ni Mayor Vincent Fernandez ang programa sa kulminasyon diin si Bise Mayor Alfredo Panerio ang mihatag sa init nga pagdawat sa tanang bisita atol sa opening remarks.

Dako sab ang pasalamat ni Fernandez sa kapulisan ug militar nga nag-alayon aron hugtan ang seguridad sa lungsod.

Giangkon ni Chief Inspector Yancee Butch Golocan, hepe sa Matanao Municipal Police Station, nga anaa ang hulga sa mga rebeldeng New People's Army (NPA) sa mga bukirang bahin sa lugar.

Apan mihatag og suporta ang katawhan ngadto sa kapulisan hinungdan nga dili makahimo sa ilang dautang plano ang mga komunista.

Mas doble alerto ang kapulisan ug militar sa lugar sanglit di pa dugay nagkatagbo ang grupo sa 73rd Infantry Battalion (IB) ug mga NPA sa Barangay Colonsabac nga gikamatay sa duha ka mga sakop sa walhong komunista.

Usa sa gipahatagan og pasidungog sa lokal nga gobyerno ang mga lumad gikan sa 33 ka mga barangay sa lugar sanglit dako kini og gikatabang ilabi na sa mga programang agrikultura sa gobyerno.

Matud ni Fernandez nga dako sab ang iyang pasalamat sa Department of Interior and Local Government nga miabag kanila sa implementasyon sa Mamamayang Ayaw sa Anomalya, Mamayang Ayaw sa Druga (Masa-Masid) mao nga bisan mga pastor sa nagkadaiyang relihiyon sa lugar miabag na sa gobyerno batok sa kampanya sa ilegal nga druga. (Orlando B. Dinoy)