GIAPROBAHAN sa kon­­seho ang ordinansahon ni Konsehal Alvin Dizon nga nag-ulohan og “Ordinance Institutionalizing the End Violence against Women and Their Children Fund of the City of Cebu” aron magahinan og pundo para sa kababayen-an ug kabataan nga dinaogdaog.

Inabagan ni Konsehal Lea Japson,buot ni Dizon nga mahatagan og labing menos P5 milyones nga gahin gikan sa Gender And Development (GAD) aron maoy gamiton sa pagpatuman sa programa.

Lakip sa mga serbisyo nga ihatag ngadto kanila mao ang paghatag og temporaryong kapuy-an, legal as­­sistance, psychological coun­­seling, medical care, job placement/job referral sys­tem, economic empowerment training para sa mga biktima.

Pagbansaybansay sa mga social worker, counselors ug ubang mga personnel nga naapil aron mapatuman ang mga nahiunang mga provision ug pagtabang sa mga barangay aron mapalambo ug mapalapdan ang ilang serbisyo.

Niadtong tuig 2013, adunay gikareport nga 458 ka mga kaso nga naglambigit sa kababayen-an ug ka­bataan ug nisaka kini ngadto sa 575 pagkasunod tuig.

Sa unang kwarter ka­rong tuiga, aduna nay 281 ka mga kaso sa pagpanagmal ngadto sa kababayen-an samtang 160 ang naglambigit sa mga bata.

Ang konsehal nagka­nayon nga positibo siya nga aprobahan ni Mayor Michael Rama ang maong ordinansahon sanglit kini maoy ilang legasiya.