TULO ka probinsiya sa Davao Region magsaulog sa ika-50 nga kasaulogan sa Hulyo 1, apan gilauman nga mas bibo ang Davao del Norte sanglit gikompirma ang presensiya ni Presidente Rodrigo Duterte.
Matud ni Gobernador Anthony del Rosario nga motambong sa anniversary program ang Presidente nga mao ang guest speaker.
Dunay tema nga "Bulawanong Paghinumdum, Bulawanong Panglantaw", ang katawhang Dabaonon magsaulog sa nakab-ot nga dagkong kalamboan sa milabay'ng 50 ka tuig nga mapasigarbuhon sa napanunod tradisyonal nga kabilin nga milahutay bisan pa sa nagkasagol nga kultura, pag-aguwanta ug pagka-creative alang sa pagtukod og maayong ugma.
Ang makasaysayanon nga pagsaulog hugot nga gisuportahan sa long-time partner nga Tagum Agricultural Development Company, Inc. (Tadeco) samtang ang ubang dagkong mga sponsors naglakip sa Ulticon Builders, Inc., Med 13, Davao Light and Power Company, ug Bebot Esmaya.
Sugdan karong Biyernes, Hunyo 23, ang 9-ka adlaw nga dagkong kalihukan bisan pa man kung ang opisyal nga pag-ihap sa 50-ka adlaw padulong sa anibersaryo gilusad niadtong Mayo 12.
Ibandera karong adlawa ang paglusad sa Kadagayaan Festival 2017 nga magpasundayag sa Agri-aqua Trade Fair, Tourism Fair, ug daghang mga produkto sa probinsiya.
Diha sa mga exhibit, makita ug mamatikdan gayud ang Dabaonong kultura ug tradisyon ingon man ang dagayang abot nga giani sa Davao del Norte sulod sa milabay'ng lima ka dekada.
Ang ubang dagkong talan-awon sa pagsaulog sa ika-50 nga kasaulogan sa Davao del Norte maglakip sa pagbalik sa Binibining Davao del Norte pageant nga magpakita sa kaanyag, kautokan, ug talento sa mga dalagang Dabaonon; Hudyaka Street Dancing ug Grand Showdown nga salmotan sa nagkalain-laing grupo gikan sa tibuok Mindanao; ang Musaman TriDavNor National Triathlon nga nagpasiugda sa mahimsog nga estilo sa pagkinabuhi nga sa samang higayon nagpakita sa maanindot kaayong lugar sa probinsiya; Davao Aguilas Football games; ug, ang matag gabii nga kalihukan lakip ang mga variety shows.
Ang ika-50 nga anibersaryo pagatiklopan pinaagi sa usa ka talagsaong fireworks display ug Kadagayaan Wet and Wild Party.
Sanglit ang 9-ka adlaw nga kalihukan dili paigo sa paghandom sa dato nga kasaysayan, kultura ug kabilin sa probinsiya, gibutyag ni Gobernador Anthony del Rosario nga iyang ilusad ang tibuok tuig Golden Year nga kasaulogan pinaagi sa nagkalain-laing aktibidades hangtud sa Hulyo 1, 2018. (Noel Baguio)