MOKABAT ngadto sa P95,000 ang nawagtang nga salapi ug butang sa duha ka mga establisamento nga gilungkab didto sa dakbayan sa Mandaue niadtong Lunes ug kagahapon sa buntag.
Katapusan giataki sa wa pa mailhing tawo mao ang DJ and Son’s Products and Services Inc. Diin mokabat sa P24,158 nga cash ang nahanaw human gisud ang ilang establisamento sa may dalan M.C. Briones, Brgy. Bakilid, sa dakbayan ug usa ka lalaki alas 7:45 sa buntag.
Matod ni PO2 Rusthy Bolotaulo sa Station 2 sa Mandaue City Police Office (MCPO) nga sa pagkakaron, ila pa nga gitino ang unod sa nakuha nila nga footage gikan sa CCTV cameras sa maong tindahan.
Saysay ni Bolotaulo nga usa ka wa pa mailhing lalaki ang misulod sa tindahan pinaagi sa paglusot sa bintana atubangan mismo sa tindahan.
Gilipat lang sa tulisan ang gwardiya nga si Glenn Cuizon, 21, human kini makatagpilaw.
Sa CCTV footage, matod ni Bolotaulo, nasuta nga nagsige na og paniid ang tulisan niadto pang Martes sa udto hangtod sa hapon sa maong tindahan.
Gani, aduna pa kini kuyog nga babaye apan ang wa na makit-i sa footage.
Samtang mokabat usab ngadto sa P71,000 ang nawagtang sa Concepcion Durable Inc. Human giguba sa wa pa mailhing tawo ang lock sa ilang roll-up door sa Door 4, Annex Frozen Building, dalan A.C. Cortes, sa dakbayan niadtong Lunes.
Gitataw ni PO2 Jason Flores sa Station 1 sa MCPO nga P50 mil nga cash ug usa ka laptop balor P21 mil ang nawala.
Ang mga biktima giila nga sila si Madel Perpetua, admin staff ug Julie Ann Mancao, sales supervisor. Paambit ni Flores nga mga alas 9 sa buntag sa dihang ablihan na unta sa duha ka kawani ang roll- up door sa ilang gitrabahuan sa dihang nakurat na lang sila nga naguba na ang kandado sa ilang opisina.
Ang P50 mil maoy nakuha sa kawatan gikan ni Perpetua samtang ang laptop gikan ni Mancao.