LAIN na usab nga sakyanan ang nalimbuwad sa South Road Properties.
Kusog nga pagpadagan ug dangog nga dalan tungod sa uwan ang gitumbok nga mga hinungdan sa aksidente alas 11 pasado sa miaging gabii atubangan sa Sugbo building.
Ang nalimbuwad mao ang Kia Picanto (AAF-4170) nga gimaniho ni Jeddonbowie Gomez, 24, taga Ramona Village, San Isidro, siyudad sa Talisay.
Naangol usab ang iyang sakay nga si Kimberly Cabreros, iyang silingan.
Sa pasiuna nga imbestigasyon nga gihimo ni PO2 Baton sa Cebu City Traffic Division nagbutyag nga gikan sa Talisay sila si Gomez ug Cabreros.
Paingon sila sa siyudad sa Sugbo, apan kalit lang nawagtangan sa iyang pagkontrolar sa sakyanan si Gomez human niliko sa kurbadahon nga dalan sa maong dapit.
Unang miigo sa gutter ang tuo nga ligid sa sakyanan hangtod nga nalimbuwad paingon sa sidewalk.
Ang dapit nga nahitaboan mao usab ang lugar diin nalimbuwad ang usa ka trak de karga sa miaging semana.
Atol sa hitabo sa miaging gabii, nagpatrolya ang mga sakop sa SRP Police uban sa mga sakop sa City Traffic Operations and Management.
Sila maoy unang nakaresponde sa alarma ug ningbunlot sa duha ka mga biktima gikan sa suds a dakyanan.
Naabut ang mga sakop sa Emergency Response ug daling gidala sa tambalanan sila si Gomez ug Cabreros.